El Gobiernu d’Asturies va publicar mientres el mes de mayo Asturies. L’orixe d’una bandera, un webcómic que va sirvir de filu conductor na celebración del 25 de mayu, que conmemora’l llevantamientu del pueblu asturianu contra l’exércitu napoleónicu y l’afitamientu de l’actual bandera del Principáu.
El webcómic, escritu y dibuxáu pol ilustrador afincáu en Xixón Javi de Castro (Llión, 1990), ta compuestu por ocho histories que narren los acontecimientos que derivaron na rebelión del 25 de mayu de 1808. Al rodiu d’esta hestoria gráfica, a partir de mañana habilitaráse la páxina web, na que podrá aportase a diversos conteníos que tienen por oxetu sopelexar y promocionar el 25 de mayu, fecha d’afitamientu de la bandera d’Asturies como enseña d’usu popular.
La hestoria de Javi de Castru dirá desbloquiándose na web, por capítulos, ente los díes 3 y 25 de mayu, según el siguiente programa:
· I. Camín (miércoles, 3 de mayu).
· II. 9 de mayu (martes, 9 de mayu).
· III. Joaquina (vienres, 12 de mayu).
· IV. Estertores (llunes, 15 de mayu).
· V. El cursu del agua (miércoles, 17 de mayu).
· VI. Los que vuelvan (vienres, 19 de mayu).
· VII. La llave (martes, 23 de mayu).
· VIII. 25 de mayu (xueves, 25 de mayu).
Les feches correspuéndense, nel casu de cuatro de los webcómic, con dalgunos de los finxos fundamentales del llevantamientu asturianu a lo llargo de 1808: la llegada de noticies de asoceder en Madrid el 2 de mayu, la sesión de la Xunta Xeneral del Principáu de 9 de mayu o los acontecimientos del 23-25 de mayu. Otros cuatro esploren aspectos relevantes de la dómina, como’l papel de les muyeres na resistencia a la invasión, los horrores de la guerra, los francesaos, l’orixe de la bandera asturiana, etcétera.
Xuntu al webcómic, la páxina va allugar un audiu cola carta razonada que Xovellanos unvió al marqués de Camposagráu onde definía cómo teníen de ser la bandera y escudu del Principáu; el llibru editáu pol Gobiernu d’Asturies en 2022 sobre’l significáu históricu de la efeméride; el documental Un día na hestoria, producíu por Radio Televisión del Principáu (RTPA), y una sección onde s’esplica’l porqué de la conmemoración y la so importancia pa la comunidá. Los conteníos publicaránse en castellán, asturianu y eonaviego.
La campaña de conmemoración inclúi tamién la publicación d’un cartelu-cómic en formatu papel qu’amuesa por una cara la promoción gráfica del día de la bandera y, pola otra, cuatro de les hestories del webcómic de Javi de Castro. Esti cartelu-cómic va distribuyir n’institutos, biblioteques, tiendes de cómic, llibreríes, etcétera.
El miércoles 3 de mayu, paralelamente al entamu de la publicación de la hestoria gráfica na páxina web, el Club Prensa Asturiana de La Nueva España va acoyer n’Uviéu la presentación del webcómic. Nel actu van intervenir l’autor, Javi de Castro; l’archivera de la Xunta Xeneral del Principáu, Josefina Velasco, y el presidente de la Sociedá Económica d’Amigos del País, José María Fernández.
