La contratación dispara’l 17,33% y les afilaciones a la Seguridá Social sumen 380.198, la cantidá más alta dende 2011.
El mercáu llaboral caltien el pulsu n’Asturies con cinco meses siguíos de descensu del paru y aumentos de l’afiliación a la Seguridá Social, y 27 meses consecutivos de cayíes nel desempléu interañal. En xunu, que los sos datos conociéronse esta mañana, rexistráronse 2.672 persones menos inscrites nes oficines d’empléu respecto al mes anterior (4,57%). El númberu de persones ensin empléu asítiase en 55.817, la cifra más baxa dende ochobre de 2008. La baxada foi la mayor d’España y bien cimera al promediu nacional, que s’asitió nel 1,84%.
En xunu, el paru baxó en tolos tramos d’edá, en tolos sectores y especialmente ente les muyeres, con un descensu del 4,91% (1.688 paraes menos qu’en mayu). Tocantes a los homes, la cayida foi del 4,08% (984 persones, en términos absolutos).
Por sectores, destaca’l bon comportamientu del industrial, con una cayida del 4,96% (200 paraos menos), lo que lo asitia percima de la media rexonal de la que supon un nuevu mínimu históricu. No que llevamos de llexislatura, el paru nel sector secundariu baxó’l 29,88% al pasar de 5.465 persones en xunu de 2019 a les 3.832 contabilizaes anguaño.
Pela so parte, nel sector servicios el retrocesu con respectu al mes anterior foi del 5,36% (2.313 paraos menos de media mensual) y tien la so esplicación na bona evolución de les actividaes venceyaes al turismu.
Na comparanza col pasáu añu, la resultancia tamién ye favorable. Asturies tien anguaño 4.353 paraos menos qu’en xunu de 2022, lo que supon un descensu del 7,23%, percima tamién de la media nacional (6,6%).
Estos datos esplíquense en bona midida pol bon entamu de la campaña turística de branu, que disparó les cifres de contratación y, por tanto, d’afiliaos a la Seguridá Social. Asturies, nesti sentíu, foi’l mes pasáu la segunda comunidá con mayor aumentu de contratos dempués de Castiella-La Mancha, y con una tasa de crecedera trés vegaes cimera al promediu d’España.
En xunu, el volume de contrataciones aumentó’l 17,33% (24.180), y trés de cada diez fueron indefiníes (7.570). Mientres, l’afiliación a la Seguridá Social aumentó en 2.206 pesonas (0,58%), hasta los 380.198 ocupaos, y en 5.334 persones al respective de xunu del pasáu añu (1,42%). Asturies nun rexistraba un nivel d’empléu tan alzáu dende va dolce años.
