El Principáu lleva la meyor repostería rexonal a la 23 edición de la feria San Sebastián Gastronomika, que se celebra dende mañana y hasta’l miércoles que vien nel centru Kursaal de la capital guipuzcoana.
La comunidá va cuntar con un estand individual baxo la marca Asturies Paraísu Natural – Cocina de Paisaxe, onde se van celebrar actividaes al cargu de trés de los más reconocíos reposteros asturianos: Julio Blanco (Pomme Sucre), Alejandro Fernández Tuero (Casa Gerardo) y Miguel Sierra, que van ufiertar talleres y degustaciones diariamente a les 11:00, a les 15:30 y a les 17:00 hores.
Amás, nel marcu de la feria, el Principáu promueve’l I Campeonatu d’España de Tarta de Mazana by Asturies, coles mires d’aprovechar les posibilidaes gastronómiques d’esta fruta baxo la fórmula de competición entre chefs de tol país. El concursu va desenvolvee’l martes, día 16, y va cuntar cola participación d’ocho cocineros: Ander Rodríguez Martín (Narru, Donosti), Núria Gironès (Ca l’Isidre, Barcelona), Gonzalo Armas (Carbón Negro, Madrid), Diego Guerrero (Dspeack, Madrid), Alejandro Fernández (Casa Gerardo), Manu Yarza (Yarza, Valencia), David Andrés (La Ventana, Santander) y Romain Fornell (Caelis, Barcelona).
El ganador va ser escoyíu por un xuráu de 8 profesionales y el resultáu de les deliberaciones va dase a conocer a les 16:30 hores.
La participación d’Asturies en San Sebastián Gastronomika forma parte de les acciones incluyíes nel plan de posicionamientu gastronómicu presentáu en mayu en Fitur, ente les que figuren tamién l’asistencia a Madrid Fusión, la promoción de los World Cheese Awards y la celebración del I Congresu Internacional de Gastronomía, Muyeres y Mediu Rural Fémines, a les que se va sumar el Congresu Bienestar y Gastronomía que se va facer n’Avilés n’avientu.
