Asturies intensificó la inspección y control sobre les viviendes d’usu turísticu (VUT), con un notable crecimientu del númberu de revisiones realizaes y espedientes sancionadores abiertos nel últimu añu. Esta evolución débese al aumentu de les actuaciones d’oficiu, al incorporase al Serviciu d’Inspección y Disciplina dos nuevos inspectores y al ponese en marcha una aplicación ellaborada pola Dirección Xeneral d’Estratexa Dixital que detecta establecimientos illegales.
Asina, a lo llargo del añu pasáu efectuáronse 3.366 inspecciones n’empreses turístiques, un 173,7% más que l’añu anterior, cuando se realizaron los 1.230. Esti crecimientu foi entá más significativu nel ámbitu de les viviendes d’usu turísticu, nes que se multiplicaron por siete les actuaciones: 1.825 inspecciones en 2024, frente a 248 en 2023, lo que supón un aumentu del 636,7%.
Al respective de los espedientes sancionadores, tamién se rexistró una importante xubida. En 2024 tramitáronse 617, frente a los 552 del añu anterior. Nel casu específicu de les VUT, les sanciones pasaron de 62 en 2023 a 117 en 2024, lo que representa un aumentu del 88%.
Esti refuerzu na inspección respuende a la voluntá del Executivu autonómicu de garantizar la llegalidá na ufierta turística, evitar la competencia deslleal y protexer tanto a visitantes como a residentes.
La Conseyería de Presidencia, Retu Demográficu, Igualdá y Turismu impulsó nesta llexislatura un serviciu específicu d’inspección turística p’ameyorar ya intensificar el control frente al crecimientu qu’esperimentaron los pisos vacacionales nos últimos años.
Nesti contestu de crecimientu turísticu, el gobiernu d’Asturies sigue apostando por un desenvolvimientu sostenible y pola regulación del mercáu de viviendes turístiques pa garantizar la convivencia y ameyorar la calidá del destín. Pa ello, modificó la Llei de Turismu y trabaya nun decretu específicu sobre les condiciones que tienen de cumplir les viviendes d’usu turísticu.
