El conxuntu de los establecimientos turísticos asturianos apurrió agospiamientu mientres payares a 120.183 persones que xeneraron 236.240 pernoctaciones, según los datos publicaos pol Institutu Nacional d’Estadística (INE). Son datos que representen una crecedera del 11,3% en turistes y del 7,4% en pernoctaciones al respective de 2022, a pesar de nun cuntar col tradicional impulsu del día 1, al cayer esti festivu en miércoles.
“Estes cifres reafiten el camín que marquemos escontra la desestacionalización del turismu n’Asturies: creciendo en temporada baxa y rexistrando un nuevu récord de visitantes nun mes de payares”, aseguró la vicepresidenta d’Asturies y conseyera de Presidencia, Retu Demográficu, Igualdá y Turismu, Gimena Llamedo.
Los hoteles fueron los establecimientos preferíos polos viaxeros y xeneraron por sí solos más de 200.000 estancies. Pela so parte, el turismu internacional confirmó un mes más el so enclín a l’alza, con una medría del 33% en turistes y del 37% en pernoctaciones. Amás, l’empléu rexistráu nos agospiamientos turísticos xubió a 4.164 persones, un 1,99% más qu’en payares de 2022.
Estos datos súmense a los consiguíos nos diez primeros meses de 2023, que yá superaren nel so conxuntu a los de too 2022, al degolar per primer vegada’l llistón los 2,5 millones de viaxeros. De xineru a payares agospiar n’Asturies 2.645.681 persones, casi un 14% más que nel mesmu periodu del añu anterior.
