El paru rexistráu baxa por tercer mes consecutivu: 3.601 desempleaos menos, principalmente en construcción y industria
La recuperación de l’actividá económica de resultes de la meyora de los indicadores sanitarios y el llevantamientu progresivu de les restricciones amuesa n’Asturies un efectu directu nel empléu. L’afiliación a la Seguridá Social creció en mayu en 3.245 persones, hasta asitiase en 362.662, lo que supón un 0,90% más. En términos interañales, rexístrense 12.051 afiliaos más (+3,44%), según los datos publicaos güei pol Ministeriu de Trabayu y Economía Social.
L’aumentu de la contratación llevó a rexistrar el tercer descensu mensual consecutivu del desempléu rexistráu y la segunda cayida interañal n’Asturies. Asina, el paru baxó en 3.601 persones en mayu (-4,31%) y en 3.919 persones (-4,67%) en relación col mesmu mes de 2020. En dambos casos, la evolución autonómica sigue siendo más favorable que la media nacional, que rexistra retrocesos, respectivamente, del -3,31% y del -1,98.
D’esta manera, el desempléu asítiase en 79.941 persones y baxa de les 80.000 por vez primera nos postreros siete meses. Esta baxada dase en dambos sexos, en tolos sectores d’actividá y en tolos tramos d’edá. Destaca’l notable retrocesu ente la mocedá, yá que en mayu’l desempléu ente menores de 25 años amenorgó en 551 persones, casi’l doble que la media rexonal, con un -8,23%.
Nel cómputu interañal sobresalen los descensos nel sector de la construcción (-19,02%), nes actividaes industriales (-16,37%) y nos servicios (-5,15%).
Per otra parte, en mayu formalizáronse 23.743 contratos, un 49,98% más que n’abril y un 134,87% más que nel mesmu mes de 2020. En dambos casos, la evolución d’Asturies ye muncho más favorable que la media nacional y asitien al Principáu, en dambos períodos d’análisis, como la segunda comunidá con meyor evolución de la contratación.
El indicadores d’afiliaciones a la Seguridá Social y de paru rexistráu lleven a un amenorgamientu en 2.914 de les persones trabayadores incluyíes n’espedientes de regulación temporal d’empléu, lo qu’asitia la cifra total d’emplegaos regulaos por esta figura en 9.499.
Énte esti escenariu de recuperación, la directora xerente del Serviciu Públicu d’Empléu (Sepepa), Pilar Varela, señala que’l Gobiernu d’Asturies va siguir trabayando nel desenvolvimientu de polítiques actives que dexen acelerar a recuperación del empléu perdíu nel últimu añu de resultes de la pandemia. “Los datos anímennos a siguir trabayando nesta dirección”, sorraya.
