Asturies rexistra 67 aules y 1.292 estudiantes confinaos na última selmana pola incidencia de la covid en centros educativos

Asturies rexistró dende’l 12 de xineru hasta ayeri, día 18, un total de 67 aules, 1.292 estudiantes y 51 docentes confinaos pola incidencia del coronavirus nos centros educativos públicos, concertaos y privaos, incluyíes les escueles de 0 a 3 años. Esto supón que les autoridaes sanitaries decidieron aisllar el 0,84% de les 7.887 clases abiertes na comunidá y al 0,88% del alumnáu matriculáu dende’l primer ciclu d’Infantil hasta Bachilleratu y Formación Profesional (FP).

La cifra cola que se calcula’l porcentaxe d’alumnáu afectáu actualizóse colos rexistros finales de matrícula, nos que figuren 145.400 estudiantes.

La Conseyería de Salú echó voz a lo llargo d’esta selmana de 310 casos de covid-19: 255 ente l’alumnáu, 49 ente’l profesoráu y otros 6 ente monitores y monitores y trabayadores de servicios complementarios. Nestes resultancies tán incluyíos los 9 positivos confirmaos col peneráu estraordinariu nos institutos de Grau, entamáu mientres el xueves y vienres de la selmana pasada.

Per otru llau, les autoridaes sanitaries encamentaron el confinamientu mientres 10 díes de too l’alumnáu y el profesoráu del Centru d’Educación Infantil (CEI) Sagrada Familia, de Corvera, y la realización d’una PCR al términu del aislamientu. El CEI imparte clases nos dos ciclos d’Infantil.

Los procedimientos que se ponen en marcha énte la detección de positivos por coronavirus venceyaos a colexos ya institutos recoyense na Guía d’actuación énte l’apaición de casos de covid-19, ellaborada pola Dirección Xeneral de Salú Pública y el Serviciu de Salú del Principáu (Sespa) y publicada nel portal Educastur.