La recuperación progresiva de l’actividá económica n’Asturies ta traduciéndose nuna reactivación del empléu y nuna meyora de la contratación. Según los datos fechos públicos esta mañana pol Ministeriu de Trabayu, el desempléu rexistráu baxó en 2.870 persones en xunu. Esta cifra supón una mengua del 3,42 % al respective del mes anterior. Con esta evolución, el númberu de persones inscrites como demandantes d’empléu nes oficines del Serviciu Públicu d’Empléu (Sepepa) ye de 80.990. Asturies foi la comunidá autónoma col mayor descensu del desempléu en términos porcentuales y la cuarta n’absolutos.
Anque l’enclín na recuperación del empléu yá se notare en mayu, foi nes últimes selmanes cuando se produció una evolución más favorable. Nos postreros trenta díes la contratación aumentó’l 85,53 % al rexistrase 18.755 contratos. La Seguridá Social ganó 2.614 cotizantes (+0,75 %) hasta asitiase la cifra total d’afiliaciones en 353.225 persones. Amás, un total de 21.810 trabayadores dexaron de tar afectaos por regulaciones d’empléu.
Menos positivos son los datos si se comparen colos del añu pasáu. La medría porcentual ye del 19,94 % (13.464 paraos más). El fuerte impactu económicu y social de la crisis sanitaria notóse menos n’Asturies, onde l’aumentu tuvo ocho puntos perbaxo de la media nacional. Tocante a la evolución mensual del desempléu, en xunu rexistráronse descensos en dambos sexos, en tolos tramos d’edá y en tolos sectores económicos, sacante’l colectivu ensin empléu anterior. Destaquen les cayíes percima de la media na construcción (-6,30%), na industria (-3,83%) y nos servicios, onde’l retrocesu ta nel -3,80%.
El paru baxó un 3,86% en Xixón; un -2,10% n’Uviéu, un 3,56% n’Avilés, y 3,98% en Siero. Les cayíes más pronunciaes, de dos díxitos, concentráronse nos conceyos más dependientes de l’actividá turística, concretamente en Cabrales (-16,65%); Cangues d’Onís (-10,81%); Colunga (-18,66%); Llanes (-17,88%) y Onís (-13,33%).
