La viceconseyera de Turismu recibió güei na República Checa’l testigu del Campeonatu Mundial de Batéu d’Oru, que se celebra estos díes en Zlate Hory. La llocalidá de Navelgas, en Tinéu va ser la see d’esta competición del 3 al 9 d’agostu de 2025. Ta previsto que la prueba lleve al conceyu vaqueiru a más de 800 persones.
La viceconseyera presentó esta tarde énte más de 400 participantes de 20 países les condiciones y recursos d’Asturies como “paraísu natural” qu’apuesta pola sostenibilidá, con más del 40% del so territoriu protexíu, y una especial riqueza cultural y etnográfica.
La presentación na República Checa incluyó tamién una espicha tradicional con productos típicos asturianos y un puntu d’información turística nel que se proyectó un vídeu promocional sobre los atractivos de la comunidá.
Mediu centenar de representantes de l’Asociación de Bateadores d’Oru Barciaecus, de Navelgas, representen a España nel mundial, que va rematar el sábadu. Amás de competir, promocionen el próximu campeonatu, nel que van actuar como delegación anfitriona col sofitu del Gobiernu d’Asturies y el Conceyu de Tinéu.
La hestoria del occidente asturianu ta amestada al oru dende la dómina castreña, una vinculación que queda documentada y caltiense viva nel Muséu del Oru de Navelgas, nel que s’entamen demostraciones y talleres de batea pa turistes.
Tinéu yá entamó en 2005 el campeonatu européu y darréu, en 2008 y 2015, dos tales competiciones mundiales.
