El Conseyu de Ministros, a petición del ministru de Cultura y Deporte, Miquel Iceta, aprobó na so reunión de güei l’alcuerdu pol que s’autoriza la propuesta de distribución territorial y los criterios de repartu de los créditos xestionaos poles comunidaes y ciudaes autónomes de Ceuta y Melilla col oxetivu de desarrollar reformes ya inversiones orientaes a la dinamización, reestructuración y modernización del sector del deporte por un importe de 49 millones d’euros mientres 2021.
Esta partida enmárcase dientro de la llinia de Transición Ecolóxica del Plan de Recuperación, Tresformación y Resiliencia y va destinase íntegramente a renovar instalaciones de los Centros d’Altu Rendimientu y Tecnificación Deportiva repartíos per tola xeografía española.Trátase d’impulsar l’adaptación de los mesmos a la nueva realidá socioeconómica al traviés de los procesos de tresformación dixital y de transición ecolóxica que seyan necesarios pa la so modernización.
En concretu, les acciones que van facese enmárquense dientro del proyectu Modernización de Centros d’Altu Rendimientu: Plan Enerxía Deporte 2.0. N’él contémplense delles acciones destinaes a la sustitución de les enerxíes actuales qu’empleguen nel so funcionamientu per otres con menos emisiones contaminantes, y tamién la renovación d’equipos pa la obtención del máximu rendimientu enerxéticu de caún de los sistemes de los que disponen.
Al menos 54 centros de tecnificación y/o instalaciones deportives van beneficiase d’estos 49 millones, lo que-yos va permitir renovar los sos equipamientos, ameyorar la so eficiencia enerxética y actualizar les sos infraestructures. Tres l’autorización de los criterios de repartu per parte del Conseyu de Ministros, va ser la Conferencia Sectorial del Deporte la que bien lluéu va aprobalos con calter definitivu.
Nesti repartu, Asturies va cuntar pa modernizar el so sector del deporte con 1.547.334,51 euros.
