El Gobiernu del Principáu va movilizar 30.425.000 euros nos trés años vinientes pa impulsar el Programa d’Emprendimientu d’Asturies 2021-2023, que busca xenerar actividá económica y empléu, favorecer la cultura entamadora, ampliar el texíu empresarial y ayudar a la medría y afitamientu de les pymes.
La puesta en marcha d’esti programa, ún de los compromisos recoyíos nel alcuerdu de la Concertación pa la Recuperación d’Asturies (CREA), implica un conxuntu de midíes que, con calter tresversal y una visión integral, van actuar sobre tolos elementos qu’influyen nel emprendimientu y la competitividá empresarial.
Alliniáu cola Estratexa España Nación Entamadora presentada pol Gobiernu d’España en febreru, el plan articúlase alredor de cinco exes:
- Motiva: creando cultura entamadora, empobináu a estimular los valores y la cultura del emprendimientu cola voluntá d’actuar sobre les persones más moces con un refuerzu importante de los programes de Valnalón nel ámbitu educativu
- Inicia: de la idea al negociu, onde s’articulen acciones pa facilitar los procesos de conversión de les idees empresariales en modelos de negociu, quier dicise, crear les oportunidaes necesaries pal emprendimientu n’Asturies.
- Consolida: creando un ecosistema entamador sólidu, coles mires de favorecer l’afitamientu de les iniciatives y los modelos de negociu.
- Financia: instrumentos y ayudes al emprendimientu y la economía social, que recueye les llinies de sofitu económicu y de financiamientu pa les persones entamadores.
- Asturies entama, comunica y reconoz, que contempla les midíes de sensibilización y difusión del programa, lo mesmo que de reconocencia al llabor entamador.
El conseyeru d’Industria, Empléu y Promoción Económica, Enrique Fernández, presentó güei esta iniciativa na sede de la Ciudá Industrial del Valle del Nalón (Valnalón), nun actu onde participaron tamién los directores xenerales de Comerciu, Entamadores y Economía Social, Julio González Zapico, y d’Empléu y Formación, Pedro Fernández-Raigoso. Amás, asistieron la directora xerente del Serviciu Públicu d’Empléu (Sepepa), Pilar Varela; la directora xeneral del Idepa, Eva Pando; la conceyala de Facienda de Llangréu, Patricia Fernández; la presidenta de la Federación Asturiana de Conceyos (FACC), Cecilia Pérez; la vicesecretaria xeneral de Política Institucional y Recursos d’UXT, Nerea Monroy; la secretaria xeneral de CC. OO. del Nalón, Esther Barbón; el presidente de l’Asociación d’Empresarios Mozos y vicepresidente de Fade, Pablo González; la directora xerente de Valnalón, Marta Pérez, y la directora del Centru Européu d’Empreses y Innovación (CEEI Asturies), Cristina Fanjul.
Fernández señaló que “estimular les capacidaes entamadores representa un retu de grandes dimensiones y una oportunidá”, sobre manera nun contestu como l’actual, “onde la pandemia de la covid xeneró una crisis social y económica ensin precedentes”. “Tamién ye una obligación si queremos refacer y reactivar el texíu productivo y ayudar a la recuperación de los empleos perdíos”, añedió’l titular d’Industria.
Al so xuiciu, el programa d’emprendimientu ye un instrumentu “tresformador”, que busca la xeneración de riqueza y prosperidá a partir d’una visión integral coles mires de llograr, polo menos, estos obxetivos:
- Promover la ordenación, integración y coordinación de programes, infraestructures y instrumentos del ecosistema de sofitu al emprendimientu cola mira d’estimular la creación d’empreses.
- Homoxeneizar los servicios d’asesoramientu ufiertaos al traviés de la rede de centros públicos ACEPPA, de cara a la puesta en marcha d’un serviciu únicu de creación d’empreses.
- La puesta en marcha d’una oficina virtual d’orientación al entamador.
- Potenciar el llabor del CEEI pa favorecer la medría acelerada de proyectos con munchu componente innovador.
- Esparder a tol ámbitu educativu los programes de fomentu del espíritu entamador de Valnalón, de manera que lleguen a involucrar a 850 centros, 1.100 docentes y cuasi 35.000 estudiantes. Tamién se propón potenciar la Cátedra d’Emprendimientu de la Universidá d’Uviéu y la posibilidá de poner en marcha un máster n’emprendimientu.
- Estimular l’intraemprendimientu, fomentando programes dientro de les empreses pa identificar casos d’éxitu y modelos de referencia.
- Sofitar les habilidaes directives d’autónomos nuevos que precisen adquirir o ameyorar conocimientos en xestión empresarial
- Sofitar los procesos de tresmisión d’empreses, intermediando ente persones con vocación entamadora y firmes solventes abocaes al cese d’actividá por falta de relevu xeneracional, cola ayuda de mecanismos d’asesoramientu financieru, xurídicu, fiscal y económicu.
- Adaptar los instrumentos de promoción y sofitu económicu a les necesidaes y característiques específiques de les empreses de creación nueva, les pymes y la economía social.
- Promover l’emprendimientu nel mediu rural, sobre manera ente muyeres, dando sofitu al Centru d’Innovación .
