El gobiernu d’Asturies va recibir 628.901 euros pa promover la igualdá de xéneru y l’inclusión de persones con discapacidá nel deporte. La conseyera de Cultura, Política Llingüística y Turismu, Berta Piñán, participó güei na Conferencia Sectorial de Deporte que dio lluz verde a los criterios de repartida ente comunidaes de los fondos Plan de Recuperación, Tresformamientu y Resiliencia destinaos a aumentar la presencia y visibilidá de les muyeres nel ámbitu deportivu y fomentar la participación de les persones con discapacidá.

Los fondos van dexar impulsar la organización de competiciones femenines y n’igualdá dientro y fora del ámbitu federativu, asina como poner en marcha proyectos de conciliación familiar específicos pa esti sector. En materia de formación n’igualdá, contémplense acciones destinaes a personal técnicu deportivu, docentes d’Educación Física, árbitres, xueces y entrenadores. Les campañes de sensibilización en centros educativos y de visibilidá pa ampliar los colectivos d’árbitres y entrenadores son tamién midíes estratéxiques.

Per otra parte, col fin de llograr una mayor inclusión de les persones con discapacidá va realizase una apuesta específica pol deporte base, pa garantizar que neños y neñes con discapacidá puedan practicar deporte y cunten colos materiales afechos necesarios. Asina, van desenvolvese acciones tresversales de formación y sensibilización en materia d’inclusión pa técnicos y profesoráu, y van entamase actuaciones en centros educativos por que la mocedá tome conciencia de la necesidá de que les persones con discapacidá participen na práctica deportiva.

Toles acciones de fomentu de la igualdá de xéneru y d’inclusión de les persones con discapacidá van desenvolver a lo llargo d’anguaño y hasta finales de setiembre de 2023. El Gobiernu d’España va tresferir al Principáu les correspondientes añalidaes: 488.364 euros anguaño y 140.536 el próximu. En total, el Plan de Recuperación, Tresformamientu y Resiliencia va destinar 17,9 millones a reforzar la presencia de les muyeres nel ámbitu deportivu y favorecer la inclusión de les persones con discapacidá.

La conseyera Berta Piñán amosó’l so prestu por esta midida. “Ye fundamental que se promueva que les muyeres y les persones con discapacidá puedan practicar deporte en condiciones d’igualdá”, señaló. “Les polítiques d’igualdá son tresversales y el mundu del deporte merez inversiones pa avanzar esta sienda”, dixo. Tamién recordó que la defensa de la igualdá ye una de los grandes apuestes de la nueva Llei de Deporte y Actividá Física del Principáu que la Xunta Xeneral aprobó la pasada selmana.