Asturies va recibir esti añu 84.881.050 millones pal desenvolvimientu de polítiques actives d’empléu que fortalezan la formación profesional de trabayadores y fomenten l’insertamientu llaboral de los colectivos con mayores dificultaes pa aportar al mercáu de trabayu.
La asignación de fondos aprobóse esta tarde na Conferencia Sectorial d’Empléu y Asuntos Llaborales presidida pola ministra de Trabayu y Economía Social, Yolanda Díaz, y na que participaron de manera telemática’l conseyeru d’Industria, Empléu y Promoción Económica, Enrique Fernández, y la directora xerente del Serviciu Públicu d’Empléu (Sepepa), Pilar Varela.
Del total asignáu a Asturies, 75.112.960 euros correspuenden a fondos de la mesma conferencia sectorial para’l financiamientu de programes de formación y empléu. Esi añu, el el gobiernu d’Asturies va recibir 11,1 millones más que’l pasáu.
El restu de la partida, por importe de 9.768.090 euros, ye financiamientu apurríu pol Mecanismu de Recuperación y Resiliencia (MRR) pa dar continuidá a los programes impulsaos en 2021 en materia d’emprendimientu, equidá, primeres esperiencies llaborales pa mozos desemplegaos y reequilibriu territorial.
A nivel estatal, la Conferencia Sectorial d’Empléu y Formación distribuyó ente les comunidaes 2.415,15 millones y 383,4 más procedentes del MRR.
Les partíes que va recibir Asturies constitúin el núcleu del presupuestu del Sepepa pa la puesta en marcha de los distintos programes encuadraos nes polítiques actives d’empléu, qu’esti añu van movilizar 127.304.235 euros y van beneficiar a más de 25.000 persones. Estos fondos financien planes de formación pa desemplegaos y ocupaos, contratos en práctiques en conceyos pa mozos titulaos como primer esperiencia llaboral, planes llocales d’empléu, escueles taller y cases d’oficiu, ayudes para’l caltenimientu de l’actividá de los centros especiales d’empléu, el fortalecimientu de la Formación Profesional (FP) dual y la formación con compromisu de contratación.
Otres de les víes de financiamientu de les polítiques actives d’empléu son la Conferencia del Sistema Nacional de Cualificaciones y Formación para l’Empléu, el Fondu Social Européu (FSE) y los presupuestos autonómicos.
