Un fragmentu facial humanu descubiertu nel yacimientu de la Sima del Elefante (Sierra d’Atapuerca, Burgos) en 2022 y datáu ente 1,1 y 1,4 millones d’años constitúi la cara más antigua conocida d’Europa occidental. Esti restu, catalogáu como ATE7-1, foi atribuyíu a Homo affinis erectus y representa una pieza clave pa entender les primeres migraciones y la evolución de los homininos nel continente européu mientres el Pleistocenu inferior.
L’estudiu d’esti afayu foi publicáu na revista Nature y foi lideráu pola Dra. Rosa Huguet, investigadora del IPHES-CERCA, profesora asociada de la Universitat Rovira i Virgili (URV) y coordinadora, xunto col Dr. Xosé Pedro Rodríguez-Álvarez, investigador de la URV, de los trabayos d’escavación ya investigación nel yacimientu de Sima del Elefante. L’estudiu ye frutu de la collaboración ente una amplia representación de personal investigador y técnicu del IPHES-CERCA y la URV, mesmo que d’otres instituciones nacionales ya internacionales, ente les que participa’l Centru Nacional d’Investigación sobre la Evolución Humana (CENIEH) y la Universidá d’Uviéu.
Como esplica la Dra. María Martinón-Torres, directora del CENIEH y una de les investigadores principales del Proyectu d’Investigación d’Atapuerca: “Homo antecessor comparte con Homo sapiens una cara d’aspectu más modernu y la proyección de los güesos de la ñariz, mientres que la configuración de la cara de Pink ye más primitiva, con traces que recuerden a Homo erectus, especialmente na so estructura nasal, plana y pocu desenvuelta”. Sicasí, la investigadora sorraya que “la evidencia entá nun ye abonda pa una clasificación definitiva y por eso asígnase a H. aff. erectus. Con esti términu reconocen les afinidaes de Pink con Homo erectus, pero déxase abierta la posibilidá de que perteneza a otra especie”.
El fósil ATE7-1, datáu ente 1,1 y 1,4 millones d’años, ye significativamente más antiguu que los restos de Homo antecessor, que la so antigüedá calcúlase n’aprosimao 860.000 años. Esta cronoloxía suxere que Pink pertenez a una población que llegó a Europa nuna folada migratoria anterior a la de Homo antecessor.
