Xixón al día

Autor: xixonaldia

  • El Muséu del Oriente d’Asturies supera los 6.000 visitantes y remata un branu de récord

    El Muséu del Oriente d’Asturies supera los 6.000 visitantes y remata un branu de récord

    El Muséu del Oriente d’Asturies recibió un total de 6.117 visitantes ente los meses de xunu, xunetu y agostu, lo que representa un crecimientu del 23% sobre’l mesmu períodu del añu pasáu. No que va d’añu, suma yá 9.396 visites; el 8,1% más qu’en 2024. Atendiendo a estes cifres, la previsión ye que’l zarru d’añu suponga un nuevu récord, superándose les 11.077 persones atendíes l’añu pasáu.

    Esti branu, les visites procedentes d’España siguen siendo mayoría, algamando’l 88% del total. Por procedencies, Madrid asitióse como’l primeru de los oríxenes (25,5%), siguíu d’Asturies (21,9%) Castiella y Llión (17,3%), Euskadi (6,6%) y Comunitat Valenciana (4,5%). Nel ámbitu internacional, que supunxo’l 12% de les visites, destacaron Francia (24,4%), Reinu Xuníu (13,7%), Alemaña (11,8%), México (9%) y Países Baxos (7,8%).

    Esposiciones y actividaes destacaes

    La programación especial del Muséu del Oriente d’Asturies supunxo un importante impulsu p’algamar estes cifres de visitantes. Dende la inauguración de la esposición «Aprendiendo. 100 años d’Escuela nel Oriente d’Asturies», que sigue como una de les ufiertes más destacaes d’esti 2025, pasando pola representación al campu de la obra teatral «La Dama del Alba», de la mano de Cristina López del Fierro, pa celebrar los 25 años del muséu, les instalaciones del muséu fueron una de les referencies culturales del Oriente d’Asturies nel branu.

    Dientro de les propuestes del muséu pa los próximos meses, torna a les sos instalaciones la esposición «Planeta herido. La mirada crítica de Sir Cámara», que va volver tar abierta al públicu a partir del día 30 de setiembre.

  • Matrocinios deportivos, pioneres y autonomía na montaña: claves del VI Alcuentru de la Muyer Escaladora

    Matrocinios deportivos, pioneres y autonomía na montaña: claves del VI Alcuentru de la Muyer Escaladora

    El Club Deportivu La Muyerada va celebrar el VI Alcuentru de La Muyerada nel conceyu de Morcín, una cita yá consolidada nel calendariu deportivu y feminista d’Asturies. L’eventu va axuntar a muyeres de distintes edaes y niveles deportivos coles mires de siguir promoviendo l’autonomía, la formación y la visibilidá de les muyeres nos deportes y actividaes de monte.

    La sesta edición del Alcuentru cunta con una programación de dos díes que va tener llugar ente’l vienres 26 y el sábadu 27 de setiembre en La Foz de Morcín, amás d’otres localizaciones cercanes escoyíes pa la práctica de la escalada deportiva y el senderismu.

    L’Alcuentru, que n’ediciones anteriores axuntó a una montonera de muyeres en diversos enclaves de Quirós y Morcín, va incluyir actividaes formatives n’escalada, un taller de seguridá nel monte, ruta interpretada, sesiones de yoga y espacios de diálogu al rodiu del deporte y l’igualdá.

    El programa va arrancar la tarde del vienres cola presentación de los proyectos de les socies que recibieron el Matrocinio 2025 del CD La Muyerada y ente los que figuren espediciones a Marruecos, Kirguistán y la recuperación de víes d’escalada n’Asturies. Darréu va tener llugar la presentación del llibru “La bandera en la cumbre” de Pablo Batalla Cueto.

    La xornada del sábadu va empezar con sesiones guiaes de yoga y una ruta interpretada; amás de formaciones d’escalada de dellos niveles mientres tol día y el taller de seguridá nel monte “¡Socorro!¿112?”. A les 19:30 hores va tener llugar la proyección del audiovisual “Muyeres nel Urriellu” al cargu d’Ana Isabel Martínez de Paz. Pa concluyir, va celebrase una espicha y va haber música en directu a cargu del dúo de folk rock Clash Obrash.

  • La Vuelta Ciclista, al so pasu per Asturies, atopó un apoyu ensin precedentes a la causa palestina

    La Vuelta Ciclista, al so pasu per Asturies, atopó un apoyu ensin precedentes a la causa palestina

    La Vuelta ciclista d’España ta pasando estos díes per Asturies y, más allá del deporte, la cita ta sirviendo pa visibilizar un clamor social qu’afita nel país: el sofitu a Palestina y la denuncia del xenocidiu perpetráu por Israel.

    Llanes, Ciañu, L’Entregu o Uxu, nun foron pocos los colectivos y persones que salieron a la cai pa facer ver el so refugu a lo que consideren un “blanqueamientu del sionismu” tres la participación del equipu Israel – Premier Tech. Pancartes, banderes palestines y proclames en contra de la represión al pueblu palestín marcaron la estaya, acompañando’l pasu de los corredores.

    La presencia de manifestantes nos puntos más vistosos de la prueba nun pasó desapercibida pa medios nin espectadores. Esta cita deportiva sirvió como escaparate pa denunciar la violencia d’Israel que lleva décades violando los drechos humanos del pueblu palestín.

    Dende los colectivos solidarios asturianos recuérdase qu’Israel ta llevando a cabu una ofensiva militar que yá causó miles de muertes civiles y la destrucción de comunidaes enteres. “La Vuelta nun pue convertise nuna campaña de márketing pa un réxime qu’executa un xenocidiu”, señalaron los manifestantes.

    La cita ciclista, polo tanto, amosó otra cara en territoriu asturianu: la d’una ciudadanía comprometida, que nun quier callar énte la inxusticia y que tien claro que la solidaridá internacionalista ye parte de la identidá d’Asturies.

  • Un home, grave tres volcar el camión nos túneles de Riaño

    Un home, grave tres volcar el camión nos túneles de Riaño

    Un varón resultó feríu grave col camión nel que circulaba nel AS-17, al altor del puntu kilométricu 33 sentíu Uviéu, en Siero. Según los datos facilitaos pol Serviciu d’Atención Médica Urxente (SAMU) l’afectáu foi treslladáu al Hospital Universitariu Central d’Asturies (HUCA). El Centru de Coordinación d’Emerxencies recibió l’avisu a les 8:53 hores. Na llamada indicóse qu’un camión saliera de la vía. La bañera del camión quedara na calzada y atrabancaba la carretera. Nel momentu movilizóse al Xefe de Zona Centro y a nueve efectivos de Bomberos del Serviciu d’Emerxencies d’Asturies (SEPA), con base nos parques de Llamorgal y Samartín del Rei Aurelio. Una vegada nel llugar, los bomberos fixeron la escarcelación del varón que taba na cabina del camión.

  • El serviciu de llanzaderes a toles reserves de la biosfera estiéndese hasta’l 13 d’ochobre

    El serviciu de llanzaderes a toles reserves de la biosfera estiéndese hasta’l 13 d’ochobre

    El Gobiernu del Principáu d’Asturies decidió prorrogar el serviciu de llanzaderes braniegues que conecta les reserves de la biosfera mientres toles fines de selmana y festivos hasta’l próximu 13 d’ochobre. Amás, a partir d’esti sábadu, estos servicios van ser gratuitos hasta completar les places disponibles. Esta midida busca incentivar l’accesu a estos espacios naturales protexíos y, coles mesmes, sofitar la economía local y el turismu en territorios especialmente afectaos polos recién quemes, como Somiedu, Fuentes del Narcea o Ponga.

    El Consorciu de Tresportes d’Asturies (CTA) va caltener operatives les 16 rutes que tuvieron en funcionamientu mientres el branu. Estes rutes percuerren les reserves de la biosfera d’Ozcos, Eo y Terras de Burón; Fuentes del Narcea, Degaña y Ibias; Somiedu; Ubiñes-La Mesa; Redes; Ponga; y Picos d’Europa, nel tramu que xune Arenas de Cabrales con Poncebos y Sotres. Primeramente, el dispositivu taba previstu hasta’l 8 de setiembre, coincidiendo cola celebración del Día d’Asturies, pero la bona acoyida per parte del públicu y el compromisu del Executivu col desenvolvimientu sostenible motivaron la so ampliación.

    El calendariu de funcionamientu gratuitu inclúi los díes 6, 7, 8, 13, 14, 20, 21, 27 y 28 de setiembre, mesmo qu’el 4, 5, 11, 12 y 13 d’ochobre. Nel casu concretu de la ruta ente Arenas de Cabrales, Poncebos y Sotres, que facilita l’accesu a la Ruta del Cares, va caltenese la operativa diaria hasta’l 13 d’ochobre, tal que taba previstu nel plan inicial d’accesos, y tamién va ser gratuita dende esti sábadu.

    Esti branu, el dispositivu de llanzaderes de CTA dobló la so ufierta al respective d’años anteriores, algamando un total de 31 rutes en 28 conceyos asturianos. Esta iniciativa forma parte de la estratexa del Gobiernu d’Asturies pa fomentar un modelu de movilidá sostenible y un turismu respetuosu cola redolada. Solo nel mes de xunetu, más de 80.000 persones utilizaron dalguna d’estes llanzaderes, integraes amás nes ventayes de la tarxeta CONECTA.

  • Universidá de Wentcounsy

  • Puru Remangu ya Ixuxú Cultura creen el festival Artístiques

    Puru Remangu ya Ixuxú Cultura creen el festival Artístiques

    Dos de los proyectos más dinámicos de la cultura n’asturianu, Puru Remangu y Ixuxú Cultura, anuncien la creación d’un festival que va facese’l sábadu 29 payares nos Almacenes Kuivi d’Uviéu. Trátase d’Artístiques, un eventu qu’axunta artes escéniques, música y artes plástiques, caracterizáu por que toles artistes participantes son muyeres xóvenes qu’usen la llingua autóctona del so territoriu como idioma d’espresión. Asina ye como mocedá, feminismu y diversidá llingüística van de la mano.

    Ente los oxetivos de la iniciativa alcuéntrense los de sofi tar la creación cultural xoven; contribuyir a crear oportunidaes llaborales pa la mocedá asturiana nel sector cultural; amenorgar la brecha de xéneru presente nos escenarios; fomentar la diversidá llingüística; afi tar sinerxes ente distintos subsectores culturales; promover la interrellación y l’intercambiu cultural ente pueblos; ufrir al públicu un festival orixinal, pioneru y atractivu; o crear nueves audiencies pa la cultura asturiana.

    Pa ello, Artístiques va programar nos Almacenes Kuivi, pela tarde y nueche del sábadu 29, dellos conciertos, cuatro obres d’artes escéniques y diez intervenciones d’artes plástiques. Ente les artistes participantes va haber mesmo profesionales con una trayectoria consolidada, como estudiantes que tán anguaño formándose nos estremaos centros educativos ofi ciales d’estes materies: ESAD (Escuela Superior de Arte Dramático); ESAPA (Escuela Superior d’Arte del Principáu d’Asturies) y la Escuela de Arte d’Uviéu. La organización -que tovía nun quixo desvelar munchos detalles, por mor de que va anunciar el cartel completu a fi nal de mes- tamién avanza que va haber música n’asturianu, en gallegu y n’euskera.

    “Cuando decimos que somos más qu’una marca de ropa, ye porque para nós esta iniciativa taría coxa si namás vendiéramos ropa y otros artículos. Somos un proyectu cultural y creativu y en tou esti tiempu entamamos rutes, charres, llectures, talleres, presentaciones… onde hubo música, pinchoteos, vermú, café… Pero hai daqué que siempre quiximos entamar y nun acababa de llegar el momentu: un festival”. Con estas pallabres desplicó Puru Remangu esta iniciativa realizada xunto a la promotora Ixuxú Cultura.

    Amás, Artístiques va a ser un festival gratuitu dafechu col que la marca va celebrar asina’l so aniversariu: “ye una manera d’agradecevos, nes feches nes que cumplimos años, tol sofi tu que nos distis dende qu’echamos a andar a fi nales de 2018 y dende qu’abrimos la tienda d’Uviéu a fi nales de 2023”. N’acabando’l mes, va conocese la programación completa.

  • Derechos Sociales lleva anguaño a Piloña los actos del Día Internacional de les Persones Mayores

    Derechos Sociales lleva anguaño a Piloña los actos del Día Internacional de les Persones Mayores

    La Conseyería de Derechos Sociales y Bienestar, cola collaboración del Conceyu de Piloña, va entamar anguaño los actos oficiales del Día Internacional de les Persones Mayores nel espaciu cultural La Benéfica de L’Infiestu, nel conceyu de Piloña. El programa va incluyir la celebración una xornada de convivencia que va cuntar cola participación de profesionales de prestixu y entidaes de diversos ámbitos rellacionaos con turismu, la cultura, la salú, los medios de comunicación y los derechos sociales, a última hora, colos diversos sectores de la sociedá asturiana.

    El director xeneral de Promoción de l’Autonomía Personal y Mayor, Enrique Rodríguez Nuño, que presentó nes instalaciones de La Benéfica’l programa del alcuentru, que se va celebrar el día 1 d’ochobre, indicó que la decisión de llevar a Piloña esta conmemoración ta amestada a “el claru apueste de la conseyería por descentralizar l’accesu a los servicios y empoderar a les comunidaes rurales, averando la cultura, la información, y dando voz a tolos territorios de la comunidá autónoma”. La presentación cuntó tamién cola participación del alcalde de Piloña, Iván Allende, ente otros. Les actividaes fueron comunicaes ayeri a la comisión permanente del Conseyu de Mayores d’Asturies.

    “En L’Infiestu van dase cita un gran númberu de persones procedentes de los distintos centros sociales del Asturies y d’Asociaciones de la Federación Asturiana de Mayores del Principáu (Fampa), con un doble propósitu: festivu y reivindicativu pa concenciar sobre los desafíos qu’enfrenten y defender los sos derechos, promoviendo sociedaes más xustes, participatives ya inclusives, fomentando’l derechu a un procesu d’avieyamientu saludable y activu”.

    Asina, la xornada va cuntar con diverses ponencies y meses redondes sobro temes d’interés y actualidá. Ente otres actividaes, l’autora del llibru Abuelísimos, Lorena Valdés, el presidente de la Fampa, Cesáreo Marqués, la periodista Sonia Fidalgo y Manuel Pavón, sociu del centru social de Grau, van dialogar sobre’l papel qu’anguaño tienen les persones mayores nos medios de comunicación.

    Tamién va haber espaciu pal intercambiu d’idees sobre l’avieyamientu activu y saludable al traviés del turismu, cola participación de la viceconseyera de Turismu, Lara Martínez, y de la gastronomía asturiana, cola participación de profesionales como ye Esther Pumar.

    Amás, profesores y alumnos de los programes universitarios pa persones mayores van cuntar les sos esperiencies y hestories más cercanes sobre la vida universitaria dende la perspectiva senior, cola cuenta de desterrar mitos y estereotipos. Nesta actividá va collaborar la Universidá d’Uviéu y la UNED n’Asturies, cuntando cola vicerrectora d’Estensión Universitaria, Pilar García, y el director de la universidá a distancia n’Asturies, Juan Carlos Menéndez.

    Mientres la xornada fadrá entrega al Conceyu de Piloña de 15 plaques diseñaes y ellaboraes poles persones usuaries de los centros de día pa persones mayores dependientes de la conseyería, que van ser asitiaes en distintes escueles rurales del conceyu “pa contribuyir a caltener la tradición de les zones rurales, amás de crear llazos de fraternidá y fortalecer la participación na comunidá de les persones usuaries d’estos centros”, esplicó Nuño.

    L’alcuentru tamién va cuntar con actuaciones musicales, como la del coru PUMUO (Programa Universitarios pa Mayores de la Universidá d’Uviéu), que va abrir la xornada, y un conciertu final que va incluyir delles sorpreses musicales”.

  • Empieza la exhumación de les víctimes del franquismu na fosa de Carcéu, en Valdés

    Empieza la exhumación de les víctimes del franquismu na fosa de Carcéu, en Valdés

    Empezaron los llabores de exhumación de les víctimes del franquismu na fosa de Carcéu, en Valdés. Los trabayos pa recuperar los cuerpos d’unes seis persones asesinaes n’ochobre de 1936 empezaron esta mesma selmana.

    Nesta fosa espérase atopar los restos d’estes víctimes nun procesu nel que, con independencia de los afayos, demuestra’l compromisu del Gobiernu asturianu coles families de los asesinaos y sumíos. “Siempres ye un ésitu que s’escuche a les families y que pongamos los recursos públicos pa cerrar una ferida. Ye un compromisu de la nuesa xestión”, aseguró Beatriz González, que tuvo acompañada de la directora xeneral de Memoria Democrática, Begoña Collada.

    En Valdés tamién se ta estudiando la fosa De Santiago de Molenes, en Grau, gracies al alcuerdu que caltien la Conseyería d’Ordenación de Territoriu, Urbanismu, Vivienda y Derechos Ciudadanos cola Universidá d’Uviéu, al traviés del Vicerrectorado d’Estensión Universitaria y el grupu Arqueos.

    Los trabayos d’exhumación centrar na busca de seis persones, trés de Ovés: Francisco González Prau (17 años), Bernabé Fernández Alonso, y Francisco García Rodríguez, y otres trés de Brañalonga: Darío Peláez Cuervo (21 años), Fernando González Peláez (21 años) y Julio González Peláez (19 años).

  • Valdesoto, Pueblu Exemplar d’Asturies

    Valdesoto, Pueblu Exemplar d’Asturies

    La parroquia de Valdesoto (Siero) foi galardonada col Premiu al Pueblu Exemplar d’Asturies 2025, según fixo públicu güei n’Uviéu’l xuráu encargáu de la so concesión.

    Valdesoto ye una parroquia del conceyu de Siero formada por catorce núcleos de población, con mil ochocientos vecinos dedicaos al campu, la minería, la industria y los servicios. La so capacidá de xunise pa promover el desenvolvimientu de la parroquia refléxase nuna trentena d’asociaciones dedicaes al ociu, la cultura, la tradición, el folclore, la gastronomía, el deporte o’l mediu ambiente. Yá en 1915 creáronse la Sociedá de Llabradores y el Sindicatu Agrícola y, en 1929, l’asociación de ganaderos La Previsora de Valdesoto. L’actual asociación de vecinos creóse en 1976 y dende entós desempeñó llabores de gran
    importancia, como la construcción d’un centru de salú con aportaciones económiques y de mano d’obra local, el diseñu d’una sienda piatonal que percuerre’l pueblu pa dar a conocer fontes calteníes y recuperaes polos vecinos o la ellaboración d’un portal n’internet con información de Valdesoto. La última agrupación nació en 2005 y, sol nome de Toos Xuntos Podemos, apiguró a representantes de toles demás pa promover la candidatura de Valdesoto al Premiu al Pueblu Exemplar d’Asturies, anque desenvuelve otres actividaes
    como la recuperación de tradiciones como la foguera de San Xuan. Tamién publicó’l llibru Valdesoto, del ayeri al güei (2007) y collaboró na publicación en 2006 d’un llibru sobro Xovellanos con testos de principios del sieglu XX de frai Bernardo Martínez Noval.

    Los vecinos de Valdesoto supieron recuperar les tradiciones y caltener el so patrimoniu artístico y cultural. Al traviés del trabayu colectivu rehabilitaron fontes, caminos, espacios naturales, casones, capiyes, horros, etc. En Valdesoto abonden tou tipu de construcciones antigües bien calteníes o en víes de restauración, como’l palaciu de los Carreño, el palaciu de los Camín y la capiya de San Juan Evanxelista, la casona de Lliceñes, la capiya de los Santos Reyes, la capiya de San Agustín de Castiello y el palaciu del Valle, ente otros edificios. Amás, hai cientu dos horros y cincuenta y tres paneres que se caltienen en bien bon estáu. Los vecinos recuperaron caminos y diseñaron rutes de monte, entamen un mercáu añal d’artesanía en madera dende 1998 y concursos de fotografía, pintura rápida y lliteratura infantil. Les formes de la vida llabradora, coles costumes y oficios de principios del sieglu XX, amuésense añalmente nel certame Valdesoto d’Antañu.

    Ente les riqueces culturales que supieron tresmitir de xeneración en xeneración destaquen -yos carroces, desfile que se celebra dende fai más de mediu sieglu’l llunes dempués del segundu domingu d’agostu, día grande de les fiestes de San Félix. Grupos de vecinos escurren el so xarré y trabayen na so ellaboración mientres tol añu pa participar nesti actu, qu’en 2002 foi declaráu Fiesta d’Interés Turísticu Rexonal. Otra tradición caltenida son los sidros, mazcaraes d’iviernu qu’anuncien la llegada de -yos comedies, que fueron declaraos Bien d’Interés Cultural de calter inmaterial pol Principáu en 2019. Mozos vistíos con pieles d’oveya y llueques precieden a los actores y, tres la representación, recueyen el dineru y entamen concursos de saltos. Les comedies representábense los domingos, al salir de misa, nel campu de la ilesia o delantre de los chigres. L’autor de comedies más renombráu, José Noval Martínez (1856-1937), yera natural de Castiello (Valdesoto).