Autor: xixonaldia

A estes hores rexístrense n’Asturies 9 quemes forestales nos conceyos d’Ayande, Cabrales, Cangas del Narcea, Casu, Cuaña y Ponga. La situación ye la siguiente:

• Ayande (Llagu) Quema controlada. Permanez nel llugar un efectivu de Bomberos del SEPA y una empresa forestal.
• Cabrales (Camarmeña). Activu en zona alta. Controláu por personal de la guardería. Por precuru’l Parque Nacional de Picos d’Europa caltien cerrada la Ruta del Cares.
• Cangas del Narcea sigue con 3 quemes:
  • Cobos.- A les 07.30 el Puestu de Mandu Avanzáu dio por estabilizada esta quema. Siguen trabayando nel llugar 18 efectivos de Bomberos del SEPA, 3 empreses forestales. Tán realizándose trabayos de refrixeración y remate.
  • Xinestosu.- Permanez activu na zona alta. Trabayen en llabores d’estinción efectivos de Bomberes del SEPA de Cangas ya Ibias y movilizóse unu de los helicópteros d’estinción de Bomberes del SEPA
  • Val.láu.- Quema controlada. Permanecen nel llugar trés efectivos de Bomberos del SEPA y una empresa forestal.Ta previsto que la Unidá Militar d’Emerxencies se sume al dispositivu d’estinción nes próximes hores. Va allugase nel polideportivu de Cangas.
• Cuaña (Llebredo). Trabayen nos llabores d’estinción 5 efectivos de Bomberos del SEPA y una empresa forestal. Al llugar incorporóse un mandu de bomberos p’asumir la Dirección Técnica d’Estinción. Si les condiciones meteorolóxiques dexen, a lo llargo de la mañana va sumar al dispositivu unu de los helicópteros d’estinción de Bomberes d’Asturies. Amás tamién activó pa la zona, al mediudía, la BRIF de réxime domiciliariu colos sos medios aéreos y tamién la BRIF de vez presencial per tierra.
• Casu (Bezanes). Pendiente de valoración per parte de la guardería.
• Ponga (Taranes). Activu. Trabayen na so estinción Bomberos del SEPA de Cangues d’Onís.
• Quirós (L.lindes) En revisión per parte de la Guardería de Mediu Natural del Principáu.

La Conseyería d’Educación ta rematando’l cambéu del decretu d’Infantil pa introducir per primer vegada la enseñanza del asturianu y l’eonaviegu nel segundu ciclu d’esta etapa. Asina-y lo treslladó güei la conseyera d’Educación, Eva Ledo, al presidente de l’Academia de la Llingua Asturiana, Xosé Antón González Riaño, con quien repasó distintos asuntos d’interés común. Ledo calificó la xunta -a la que tamién asistió la directora xeneral d’Inclusión Educativa y Ordenación, María Dolores Bueno- de “cordial, distendida y, sobre manera, bien constructiva”.

Esti novedosu acercamientu a les llingües autóctones n’Infantil va realizase dientro de Comunicación y representación de la realidá, una de les trés árees d’aprendizaxe esistentes nesa etapa, y va tener un calter voluntariu pal alumnáu, tal que preve la Llei 1/1998, de 23 de marzu, d’usu y promoción del asturianu. Sicasí, tolos centros qu’impartan el segundu ciclu d’Infantil van tar obligaos a ufiertalo. La conseyera informó que, tres un primer sondéu realizáu nos centros d’enseñanza, la matriculación supera’l 60% ente l’alumnáu de los colexos públicos.

Ledo comprometióse, amás, a siguir trabayando dende l’alministración na promoción de la llingua asturiana y asina lo comunicará nes xuntes que va caltener a primeros de setiembre coles direcciones de los centros. Tamién va impulsar la divulgación de distintos materiales pedagóxicos.

Otru asuntu tratáu afecta al profesoráu d’eonaviegu. La conseyera y el presidente de l’Academia alcordaron buscar llinies de collaboración pa entainar la dotación de profesoráu naquellos centros onde esistan necesidaes de docentes.

Ledo informó tamién a González Riaño que’l Gobiernu volverá solicitar al Ministeriu d’Educación, Formación Profesional y Deportes la especialidá docente d’asturianu, una histórica aspiración de la conseyería y del profesoráu que sigue ensin materializase al nun ser una llingua oficial. La iniciativa de volver solicitar la reconocencia de la especialidá docente figura nel pactu Asturies Educa, robláu pol Gobiernu con cuatro organizaciones sindicales.

El Gobiernu d’Asturies ordenó la clausura de cinco agospiamientos turísticos qu’operaben ensin cumplir los requisitos esixíos pola normativa vixente. Los establecimientos, pertenecientes a la mesma sociedá mercantil y allugaos n’enclaves singulares de trés conceyos, nun tán inscritos nel Rexistru d’Empreses y Actividaes Turístiques (REAT) y escarecen del primer trámite indispensable pal exerciciu de l’actividá, consistente na presentación de la pertinente declaración responsable.

El resolvimientu qu’ordena’l cese de l’actividá foi emitida pola Conseyería de Presidencia, Retu Demográficu, Igualdá y Turismu. Los procedimientos que remataron nesta decisión sofítense n’espedientes previos con antecedentes dende 2016, nos que s’impunxeron distintes sanciones ensin llograr respuesta per parte de la empresa titular. Ente elles, destaquen dos multes coercitives, una en 2023 por valor de 10.000 euros y otra en 2024, por 20.000 euros.

Amás, el pasáu xunu, el gobiernu punxo en conocencia de l’Axencia Española de Protección de Datos la esistencia de posibles infracciones graves na web corporativa de la sociedá, relatives al tratamientu desaparente de datos personales y la vulneración de derechos dixitales. Esta sucesión de fechos llevó a la Conseyería de Presidencia a dar en la clausura d’estos establecimientos.