Empresarios autónomos y trabayadores por cuenta propia yá puen solicitar l’ayuda de 400 euros pal pagu de costos fixos de negocios y locales comerciales. El formulariu de solicitú ta disponible na sede electrónica del Gobiernu asturianu, onde s’atopa la llista coles actividaes que puen solicitar esta ayuda estraordinaria. El plazu de presentación ye d’un mes. Amás, pue solicitase información adicional la Dirección Xeneral de Comerciu, Entamadores y Economía Social nel corréu electrónicu emprendedores@asturias.org y los teléfonos 985 10 82 34, 985 10 82 31 y 985 10 82 32, de llunes a vienres n’horariu d’atención de 9:00 a 14:00 hores.
El comerciu minorista non esencial, establecimientos d’hostelería y restauración, educación presencial, actividaes artístiques, recreatives y d’entretenimientu, servicios d’arreglu, peluqueríes puen optar a les subvenciones. Estes ayudes formen parte del bloque de diez midíes socioeconómiques aprobaes pol Conseyu de Gobiernu. L’oxetivu ye sofitar a los beneficiarios nel pagu de los gastos fixos que tienen qu’encarar a pesar de tener los sos negocios zarraos.
Concretamente, van dirixíes a cubrir el costu d’arriendos de locales o cuotes hipotecaries, cuotes mínimes de suministros d’eletricidá, combustibles, agua, telefonía, conexón a internet, o seguranza. Tamién cubren gastos financieros, d’asesoría fiscal y contable, seguros y publicidá y redes sociales, amás d’alquisición y caltenimientu de software, ente otros fines. Pa esta llinia, el Gobiernu d’Asturies habilitó una partida de cuatro millones d’euros.
Modernización del comerciu
L’aprobación d’esta ayuda estraordinaria coincide cola convocatoria d’otra llinica pa la modernización del comerciu pequeñu y medianu. Esta ayuda ta dotada con 554.000 euros. Ta destinada a la renovación de la imaxe, la incorporación de tecnoloxíes nueves, y implantación de la norma de calidá de serviciu pa comerciu pequeñu. El director xeneral de Comerciu, Entamadores y Economía Social, Julio Zapico, esplica que «la modernización resulta esencial pa la pervivencia y afitamientu a un plazu mediu y llargu».
