Baiuca aportó ayeri a la Sala Acapulco de Xixón coles entraes escosaes dende va díes nun eventu de Momentos Alhambra que punxo pates arriba a tolos presentes na sala xixoniega.
Puntual, a les 21:30, el productor gallegu salió al escenariu de la conocida sala acompañáu del so equipu formáu por Xose Lois Romero y Andrea y Alejandra Montero pa facer vibrar y baillar al ritmu de la so música a un públicu que, dende’l primer cantar, amosó la so entrega.
Alejandro Guillán dio la bienllegada a Xixón tres tocar trés cantares. Diben ser les úniques pallabres dirixíes al públicu. El músicu amosó que munches vegaes sobren les pallabres y, nesti casu, el amosólu coles sos creaciones de música lletrónica de raigañu. Sonaron temes como Meigallo, Morriña, Olvídame, Vai Tu o Alentejo, la so cabera producción.
L’actuación, que duró alredor d’hora y cuartu, remató con un cantar bien conocíu pol públicu asturianu pola so rellación, Veleno, un cantar fechu a comuña con Rodrigo Cuevas. Baiuca reinó cola so música folktrónica na nueche de Xixón.
