Nieves Roqueñí va asumir la presidencia d’El Musel con trés oxetivos: consolidar la so vocación industrial cola captación d’inversiones, impulsar el so lideralgu loxísticu y asegurar la calidá medioambiental. La decisión foi anunciada güei por Adrián Barbón, quien tamién adelantró que Belarmina Díaz Aguado, actual directora xeneral d’Enerxía y Minería, va relevar a Roqueñí al mandu de la Conseyería de Transición Ecolóxica, Industria y Desenvolvimientu Económicu. Dambos nomamientos van ser aprobaos pol Conseyu de Gobiernu’l 14 de febreru.
El presidente d’Asturies xustificó la elección de Roqueñí pa dirixir El Musel, un puertu “absolutamente estratéxicu” p’Asturies, pola so formación –doctora inxeniera de mines-; pola so trayectoria profesional, pola so solvencia y, tamién, pola so empatía y bonhomía”, la conseyera ye “la meyor persona” pa esi puestu. “Tien la mio total y absoluta confianza”, añedió.
Roqueñí va sustituyir nel cargu a Laureano Lourido, quien permaneció más de nueve años al frente del puertu xixonés. La nueva etapa d’El Musel va definise con trés traces: vocación industrial, seguridá y llimpieza. El presidente destacó la capacidá de interlocución de l’actual conseyera p’atender les demandes de quien viven nes cercaníes de la zona portuaria y la so esmolición poles repercusiones ambientales de l’actividá industrial. “Queremos un puertu que mire a la ciudá”, añedió.
Barbón tamién emponderó a la próxima titular de Transición Ecolóxica. La conocencia del sector” y les sos bones relaciones institucionales, tanto col Ministeriu d’Industria como cola Comisión Europea, converten a Belarmina Díaz nuna elección aparente. “Va dexar, amás, un engranaxe total cola Axencia Sekuens y la Conseyería de Ciencia”. Al igual que Roqueñí, Belarmina Díaz ye inxeniera de mines.
El presidente aprovechó estos cambeos para modificar les denominaciones de trés conseyeríes:
- Transición Ecolóxica, Industria y Desenvolvimientu Económicu va pasar a ser Transición Ecolóxica, Industria y Comerciu. Nesti casu, dáse-y más relevancia a l’atención al comerciu.
- Facienda y Fondos Europeos va pasar a ser Facienda, Xusticia y Asuntos Europeos. Con esti cambéu, la denominación reflexa meyor l’ámbitu d’actuación de la conseyería.
- Fomentu, Cooperación Local y Prevención de Quemes va pasar a ser Movilidá, Cooperación Local y Xestión d’Emerxencies. La prevención d’emerxencies cobra especial atención. El presidente confirmó que llueu se realizarán nuevos simulacros d’emerxencies nel suroccidente y el restu del territoriu d’Asturies.
El Musel ye una de les pieces clave pa l’actividá económica y loxística d’Asturies. Mientres los últimos años intensificóse l’interés empresarial por asitiase nel puertu, con proyectos como los lideraos pol Grupu Zima o Ionway (pendiente de la decisión final de la compañía). La vinculación del puertu cola Zona d’Actividaes Loxístiques (Zalia), desbloquiada esta llexislatura, ye tamién crucial pa qu’Asturies se convierta nel polu loxísticu del Cantábricu, como se plantega’l gobiernu.
Al mandu de Transición Ecolóxica, Roqueñí entainó la tramitación ambiental de delles d’eses iniciatives, al igual que col fornu eléctricu d’Arcelor en Veriña, que va suponer un desembolsu de 213 millones. Tamién promovió la redacción y aprobación de la Llei de Proyectos d’Interés Estratéxicu, concebida pal amenorgamientu de plazos y trámites burocráticos de les propuestes con especial incidencia económica.
Nel ámbitu medioambiental, la conseyera punxo en marcha la conversión de la depuradora de Villaperi, la mayor d’Asturies, nuna biofactoría que pueda abastecer d’agua primeramente tratada a la industria de la zona central. Tamién participó nel diseñu y aprobación de los planes de depuración y suministru, pensaos por que tolos conceyos d’Asturies cunten col suministru necesariu d’agua inclusive en períodos de seca.
Este ye’l segundu axuste nel gobiernu de Barbón. El primeru producióse en febreru de 2024, cuando Marta del Arco fixo cargu de la Conseyería de Derechos Sociales y Bienestar que lideraba Melania Álvarez, nomada senadora por designación autonómica.
