Barbón encamienta en Bimenes a protexer les llingües propies pa que nun muerran: “La oficialidá n’otros territorios nun xeneró nengún problema”
El presidente d’Asturies, Adrián Barbón, encamentó ayeri en Biemenes a protexer les llingües propies, l’asturianu y l’eonaviegu, pa que nun muerran. “La oficialidá n’otros territorios nun xeneró nengún problema”, sorrayó en Bimenes, onde participó nel actu conmemorativo del XXVIII aniversariu de la Fiesta de la Oficialidá.
Acompañáu pola conseyera de Cultura , Política Llingüística y Deporte, Vanessa Gutiérrez, Barbón aportunó en que’l futuru d’Asturies “pasa pola recuperación del autoestima” y consideró posible impulsar una oficialidá amable , “aceptada polos asturianos y les asturianes”.
Nesti sentíu , aportunó en que los grupos favorables a la oficialidá de les llingües propies van presentar una proposición de llei na Xunta Xeneral pa la reforma del Estatutu d’Autonomía que va aldericase y va llevase a votación nel parllamentu . “Anque nun tengamos los 27 votos necesarios pal cambiu, sí va haber una mayoría, y esa mayoría hai que destacala, porque’l sentir de tolos asturianos y asturianes ye mayoritariamente favoratible a la oficialidá”, precisó.
Llamentó tamién la posición del Partíu Popular asturianu, «que s’echó tras» nel alderique sobre la oficialidá, y convidó a la formación a tomar exemplu del PP gallegu , «que nun tien complexos a la de defender la so llingua».
Pela so parte, la conseyera Vanessa Gutiérrez consideró “bien importante” que esi alderique llegue al parlamentu asturianu pa encaralu de manera «tranquila y constructiva». “Son munchos los argumentos pa la defensa d’esti patrimoniu inmaterial que tenemos, que nos representa , identifícanos y danos les bases como pueblu . Tien de ser parte del nuesu porvenir”, valoró .
