Barbón respalda a Pedro Sánchez pa que forme gobiernu «cuanto antes»

"Precisamos un gobiernu n'España énte'l que reivindicar, negociar y alcordar, por eso treslladé-y tol mio sofitu, pensando única y puramente nos intereses del Principáu"

0
741
Barbón pide a Podemos y Cs que desbloquien la investidura de Sánchez
Adrián Barbón. / FSA-PSOE

El presidente del Principáu, Adrián Barbón, manifestó esti martes so respaldu a Pedro Sánchez pa que pueda formar gobiernu cuanto primero. Nuna conversación telefónica, Barbón afaló al candidatu socialista a prosiguir los sos esfuercios pa encarar con éxitu la investidura: «Nun puede siguir esta situación d’interinidá y menos entá dir a terceres elecciones, la ciudadanía ta farta y ta debilitándose la estabilidá institucional».

La charra ente Barbón y Sánchez forma parte de la ronda de contactos empecipiada pol presidente en funciones pa encarar la situación política y, en concreto, les negociaciones coles qu’encara la investidura. Per parte de Barbón nun hubo duldes: tol so sofitu al candidatu. Pal presidente del Principáu, la estabilidá y el creitu institucional d’España riquen que se forme un gobiernu en plenitú de funciones y supérese dafechu’l riesgu d’una tercer convocatoria electoral.

Con esi razonamientu, el presidente asturianu denunció l’actitú del Partíu Popular y de Ciudadanos. «Cónstame que Pedro Sánchez intentó too, pero hai que llamentar la falta de llealtá institucional del PP y Cs, que tienen nes sos manes la posibilidá de desbloquiar la situación y, sicasí, prefieren el bloquéu de la política española y forzar la repetición de les elecciones, a pesar de qu’asina estropien los intereses d’España y d’Asturies».

El xefe del Executivu sorrayó que pal Principáu resulta decisivo qu’haya gobiernu estatal. «Asturies precisa con urxencia un gobiernu d’España que tenga plenitú de funciones y pueda exercer toles sos competencies. Precisámoslo pa que pueda aprobase l’Estatutu de la Industria Electrointensiva, p’acelerar la execución de les inversiones n’infraestructures y pa negociar munches otres cuestiones pendientes».

«Por eso», siguió Barbón, «pensando única y puramente nos intereses d’Asturies, no muncho que mos xugamos, na necesidá urxente de qu’haya un gobiernu d’España énte’l que’l Principáu pueda reivindicar, negociar y alcordar, reiteré-y a Pedro Sánchez tol mio sofitu y el del Gobiernu d’Asturies pa que pueda sacar alantre la investidura cuanto primero».