El Ministeriu d’Universidaes y les comunidaes alcuerden equiparar el preciu d’estos estudios oficiales a los graos.

El Gobiernu d’Asturies va rebaxar les tases en primer matrícula de los másteres universitarios habilitantes y vinculaos, lo que quier dicir, que los estudios de posgráu que son obligatorios pa exercer determinaos oficios como abogacía, docencia en Secundaria, inxeniería o psicoloxía, ente otres. La Conseyería de Ciencia va compensar a la Universidá d’Uviéu con daqué más de 200.000 euros pola perda d’ingresos nestos títulos.

La midida, alcordada na Conferencia Xeneral de Política Universitaria ente’l Ministeriu d’Universidaes y les comunidaes autónomes, busca equiparar la matrícula d’estos títulos, fundamentales p’aportar al mercáu llaboral colos graos universitarios. La propuesta va tener un periodu de dos cursos pa la so aplicación.

El conseyeru de Ciencia, Innovación y Universidá, Borja Sánchez, indicó qu’agora va estudiase’l so encaxe presupuestariu pa ver cómo se va realizar la so implantación. Sánchez recordó qu’esta iniciativa ta en sintonía coles polítiques del Principáu en materia de precios públicos na enseñanza superior y súmase al compromisu “de que naide quede ensin acceder a esti tipu d’estudios por cuestiones económiques”.

La midida va afectar a nueve másteres habilitantes o vinculaos qu’ufierta la Universidá d’Uviéu:

Máster Universitariu n’Abogacía pola Universidá d’Uviéu.
Máster Universitariu en Formación del Profesoráu d’Educación Secundaria Obligatoria, Bachilleratu y Formación Profesional.
Máster Universitariu n’Inxeniería de Caminos, Canales y Puertos.
Máster Universitariu n’Inxeniería de Mines.
Máster Universitariu n’Inxeniería de Telecomunicación.
Máster Universitariu n’Inxeniería Industrial.
Máster Universitariu en Náutica y Xestión del Tresporte Marítimu.
Máster Universitariu en Psicoloxía Xeneral Sanitaria.
Máster Universitariu en Tecnoloxíes Marines y Caltenimientu.

La iniciativa súmase a la conxelación de tases aplicada pol Principáu l’añu pasáu en toles enseñances oficiales de grau, máster universitariu y doctoráu, que supón un desembolsu pal Gobiernu d’Asturies de daqué más de 5 millones anuales destinaos a compensar a la Universidá d’Uviéu.