La obra No que cinca los seres de lleenda, de Blanca Fernández Quintana, resultó la ganadora de la primer edición del premiu Enriqueta González Rubín de narrativa moza n’asturianu. El galardón, convocáu y concedíu pola Conseyería de Cultura, Política Llingüística y Turismu, tien una dotación de 3.000 euros y la publicación de la obra.
Los miembros del xuráu destacaron de la obra de Blanca Fernández Quintana “la so temática clásica, que pon en relación la tradición mitolóxica asturiana cola historia personal a partir de la idea de qu’esa mitoloxía vive en nós y s’espeya nes relaciones familiares, calteniéndose na tresmisión xeneracional”. L’acta del xuráu conclúi que “too esto permite a l’autora ufiertar una visión distinta de la lliteratura y la música populares, de los paisaxes y paisanaxs que nos envuelven , abriendo un camín novedosu dientro de la narrativa asturiana actual”.
El xuráu encargáu de valorar los trabayos, reuníu baxo la presidencia del director xeneral de Política Llingüística, Antón García, tuvo formáu poles escritores María García y Solinca Turbón, los escritores y profesores Xuan Fernandi y Gonzalo Llamedo, y la traductora y profesora Aymara González Montoto. Lourdes Álvarez, filóloga del serviciu de la Dirección Xeneral de Política Llingüística, actuó como secretaria.
Blanca Fernández Quintana (Bimenes, 1994) ye graduada n’Estudios Clásicos y Románicos con Minor d’asturianu. Anguaño ye profesora nel IES Conceyu de Tinéu. Amás de diversos relatos publicaos na revista Formientu, en 2021 publica la novela L’home les caparines, y llogra l’I Premiu de Novela de fantasía, ciencia ficción y terror de la Editorial Radagast cola novela Trovadoresca.
El premiu Enriqueta González Rubín de narrativa pa mocedá menor de 30 años debe’l so nome a la escritora qu’entamó’l xéneru narrativu na lliteratura asturiana. Enriqueta González Rubín nació en Santianes (Ribeseya) en 1832 y morrió en L’Infiestu en 1877. En 1875 publicó la novela Viaxe del tíu Pacho el Sordu a Uviedo, la primera que se conoz n’asturianu.
