Juan Carlos Aguilera Folgueiras (Uviéu, 1969) va ocupar la Dirección Xeneral d’Industria en sustitución de Rosana Prada, a quien el conseyeru d’Industria, Empléu y Promoción Económica, Enrique Fernández, estima’l trabayu desenvueltu desque empezó la llexislatura.
Aguilera asume la so nueva responsabilidá col retu de desenvolver les polítiques en materia industrial, sobre manera los desafíos a los que s’enfrenten les empreses pa encarar el doble procesu de transición tecnolóxica y ecolóxica col fin de llograr un sector más competitivu, sostenible y con capacidá de responder a los mercaos globales.
La so incorporación a la dirección xeneral va dexar tamién reforzar la xestión de los fondos europeos como oportunidá pa impulsar la tresformación del texíu productivu rexonal y consolidar la recuperación económica tres la pandemia de la covid-19.
Juan Carlos Aguilera ye doctor inxenieru de Mines pola Universidá d’Uviéu, na especialidá de Combustibles y Enerxía, y especialista en Xestión y Auditoría Enerxética na Empresa pola Universidá Politécnica de Madrid. La so tesis doctoral céntrase nel diseñu de modelos de trabayu p’axencies d’enerxía.
Vinculáu a la Fundación Asturiana de la Enerxía (Faen) dende’l 2002, cuando se fixo cargu del área d’Enerxíes Anovables, nel 2006 designáronlu coordinador xeneral de la entidá y nel 2016 asumió la dirección xeneral. Aguilera ye miembru de la xunta directiva de l’Asociación Nacional de Clústeres y Agrupaciones d’Empreses Innovadores d’España, alministrador únicu del Consorciu Tecnolóxicu de la Enerxía d’Asturies y conseyeru de les sociedaes Producciones Energéticas Asturianas S.L., Cantaber Generación Eólica e Hidroastur.
Al mandu de Faen desenvolvió un llabor intensu na promoción de les enerxíes anovables, l’autoconsumu y la movilidá sostenible. Tamién desempeñó un llabor fundamental mientres esta llexislatura na coordinación, diseñu y ellaboración de les estratexes y foros de debate pa definir les fueyes de ruta que van dexar encarar la transición enerxética.
