Candlelight sigue la so marcha en Xixón. Con delles sesiones dende’l mes de xunetu y hasta’l próximu mes d’ochobre, l’espectáculu musical a la lluz de les veles apasiona y presta a partes iguales a tou aquel que s’avera a la Colexata de San Xuan Bautista, nel coral del Palaciu Revillaxixéu. Coldplay, Vivaldi o Hans Zimmer al alcance de la to mano y como nunca nun lo sintieras enantes. Esta fin de selmana pasada foi’l tiempu de la música de Coldplay.
Nesta fin de selmana nel que les cais de Xixón tán abarrotaes de xente glayando y festexando, delles persones abellugáronse na Colexata cola ilusión de sentir un conciertu a la lluz de les veles. Al entrar, milenta llumes allumaben el pianu qu’ocupaba’l llugar del altar esperando facer tributu a la mítica banda Coldplay. Rápido, llegó l’interprete y empecipió una velada máxica cargada de sentimientos.
Mientres dalgo más d’una hora pudo sentise dalgunos de los grandes éxitos de la banda británica como Clocks, Paradise o a Sky full of stars, pero tamién pudo emocionase con otres como Fix you. De les manes del pianista surdió la música, pero tamién tresmitió el so amor y admiración pola banda y los valores que tresmite, cuntándonos el mensaxe de caún de los cantares. Por un intre, la yá mítica banda que se fixera famosa va unos años col so tema Viva la Vida, pisó’l suelu de la Colexata de San Xuan Bautista de Xixón.
Candlelight Concerts ufre una esperiencia relaxante, na que puedes dexate llevar per un mar de lluces polos acordes del pianu y refuxate del ruíu esterior. Una inigualable opción de fin de selmana, perfecta pa dexar de llau l’agobiu del trabayu o alcontrar un plan diferente de les vacaciones na villa playa. Aínda queden más sesiones programaes nos próximos díes, pudiendo consultalo equí. Candlelight allumó la nueche de Xixón y allumará’l recuerdu de los sos asistentes pa siempre.
