Cine asturianu pal confinamientu

La iniciativa incluye un alcuentru online colos directores de les películes y l’accesu gratuitu a dellos de los curtios del catálogu de Llaboral Cinemateca Curtios

0
191
María Cotiello

Llaboral Cinemateca súmase a les distintes propuestes p’averar actividaes culturales a les cases y encarar asina la situación tan escepcional de confinamientu. Nesti marcu, La Conseyería de Cultura pon en marcha la iniciativa Llaboral Cinemateca en casa. El programa ufierta n’abiertu llargumetraxes de non ficción y curtiumetraxes realizaos por directores asturianos destacaos.

La propuesta incluye l’accesu online a delles películes, acompañaes d’un alcuentru colos directores Elisa Cepedal, Tito Montero, Marcos M. Merino y Ramón Lluís Bande. Amás, el públicu va poder disfrutar de dellos bloques de curtiumetraxes que formen o formaron parte del catálogu de distribución Llaboral Cinemateca curtios. Les proyecciones van tar disponibles, ensin costu, al traviés de la canal de Vimeo de Llaboral Cinemateca. Cada fin de selmana, dende la tarde del vienres a la tarde del domingu.

Los alcuentros colos creadores van realizase los domingos al traviés de Facebook Live. Los espectadores van poder facer les sos preguntes al director protagonista del alcuentru per trés víes: en directo de la que se retresmite, al traviés de Twitter cola etiqueta #LaboralCinematecaEnCasa, o per corréu electrónicu (info@laboralcinemateca.es).

Programación pa la fin de selmana

Curtios de Llaboral Cinemateca Vol. 1 (Disponibles dende’l vienres 27 de marzu, a les 12:00 hores, hasta’l domingu 29 de marzu, a les 23:59 hores):

  • Non Jungle!, de Carmen Menéndez (16 min.)
  • Marcus, de Fernando Lorenzana (14 min.)
  • Negrea, de Juan Luis Ruiz (16 min.)
  • Agostu, de Diego Llorente (18 min.)

Llargumetraxe: El trabajo o a quién le pertenece el mundo, d’Elisa Cepedal (disponible dende les 18:00 hores del vienres 27 de marzu hasta les 18:00 hores del domingu 29 de marzu).

 

El 29 de marzu, a les 18:00 hores, va facese un alcuentru online cola directora de la película, que recibió una ayuda a la producción de Llaboral Cinemateca nel 2017 y llevó’l Premiu Especial del Xuráu nel Festival Internacional de Cine de Xixón (FICX).

L’argumentu del llargumetraxe asítiase nel periodu que va dende la última fuelga xeneral del 2012 y el 2018, añu previstu pa zarrar los últimos pozos de carbón. Retrata la vida d’una comunidá minera de la que negocia’l declive de la propia industria que fixo posible la so emerxencia, al traviés del prisma de la etno-ficción.