El conceyal de Ciudadanos Rubén Pérez Carcedo, va entrugar na comisión d’Urbanismu del martes poles midíes que va tomar el Conceyu para asegurar que’l ministeriu de Trabayu cumple coles sos obligaciones como propietariu del inmueble y atolde la casa Sindical.

Nesti sentíu recordó que n’ochobre de 2019 presentóse per parte del Ministeriu un proyectu para remocicar l’edificiu y cumplir asina cola normativa urbanística vixente. Sicasí, el 31 de xineru, el Conceyu riquió-y al Ministeriu qu’iguara’l proyectu presentáu pa poder llograr la preceptiva llicencia. Requerimientu que, énte la falta de respuesta per parte del Ministeriu, foi repitíu’l 31 de marzu. Énte la falta de noticies, dende Ciudadanos, entrugaron na comisión d’Urbanismu del pasáu 16 ochobre, cuando se-yos esplicó «que se siguía ensin tener respuesta polo que se-y diba efectuar a un nuevu requerimientu y en casu de nun llograr respuesta impone-y multes coercitives de 1.500 euros pa forciar el so cumplimientu».

Dende entós, nun hebo noticies y l’edificiu sigue deteriorándose ya incumpliendo la normativa en materia d’urbanismu, seguridá y accesibilidá, suponiendo un riesgu pa la seguridá, tantu de les persones que trabayen o alleguen al mesmu como pa los viandantes, “por eso, y p’evitar la inacción y la pasividá que caracteriza a esti Gobiernu volvemos a llevar a la comisión a ver si asina actúen”

“Ye vergoñoso qu’en plenu centru de la ciudá s’asitie un edificiu de titularidá pública nun estáu tan llamentable, y ye un clamor ciudadanu que s’atolde d’una vegada”, afirmó Pérez Carcedo.