Los actores de doblaxe Miguel Ángel Jenner y Antonio Lara van ufiertar una clas maxistral a los alumnos de la Escuela de Doblaxe d’Asturies. Les sesiones van tener llugar el xueves 25 y el vienres 26 y van tar abiertes al públicu interesáu.
Miguel Ángel Jenner ye la voz habitual de Samuel L. Jackson, Jean Reno, Ving Rhames y David Keith, y cuenta con una trayectoria peramplia como actor de doblaxe y llocutor. Antonio Lara ye la voz habitual de Matt Dillon, Billy Crystal, James Belushi y Elias Koteas, y un habitual de la llocución publicitaria española. Jenner y Lara son dos de los referentes fundamentales del doblaxe n’España.
Na Escuela de Doblaxe d’Asturies, proyectu encabezáu pol asturianu Illán Gonzali, tamién participaron n’acciones formatives otres voces bien conocíes como Claudio Serrano (Ben Affleck / Batman), Fernando Cabrera (Sheldon Cooper / The Big Bang Theory), Isacha Mengíbar (Lisa Simpson), Alejandro Saudinós (Bob Esponja), Carlos Ysbert (Homer Simpson), Jorge Saudinós (Oliver Atom / Oliver y Benji), Juan Perucho (Peter Griffin de Padre de familia), Jesús Pinillos (Leonard Hofstadter / The Big Bang Theory), Alfonso Vallés (Daniel Craig / Tim Roth), Javier Roldán (Carlos Bernard / Joaquim de Almeida) y Lola Oria (La forma del agua).
