Un añu más, Colunga va ser una de les sedes -xunto con Avilés, Llangréu, L.lena, Villaviciosa y Cangues d’Onís- de les Estensiones del Festival Internacional de Cine de Xixón, cola 59ª edición qu’entama esti vienres.
Les proyecciones van poder vese a les 19:00 hores los sábados 20 y 27 de payares na Sala Loreto, con entrada llibre y de baldre hasta enllenar l’aforu.
El sábadu 20 va proyectase la película francesa «Al Abordaxe», dirixida en 2020 por Guillaume Brac. Una tarde calurosa de branu en París, Felix conoz a Alma por casualidá. Ríen, baillen y pasen la nueche nun parque. Pero’l so tiempu xuntos remata de sópitu cuando ella tien que colar de vacaciones cola so familia. Félix decide sorprendela yendo al llugar onde ta de vacaciones, y convence a un collaciu pa que lu acompañe na aventura. El rapaz col que comparte coche nel viaxa tamién acaba xuniéndose al plan llocu nel que nada paez salir como lo planearen.
El sábadu 27 va proyectase la estadounidense «First Cow», dirixida en 2019 por Kelly Reichard. Esta obra cunta la hestoria d’un cocineru contratáu por una espedición de cazadores de pieles nel estáu d’Oregón, na década de 1820. Tamién la d’un inmigrante chinu misteriosu qu’huye d’unos homes que lu persiguen, y d’una nueva amistá ente dambos nun territoriu hostil.
Ye la novena vez que l’Ayuntamientu de Colunga, al traviés del Área de Cultura, llegó a un alcuerdu col Festival Internacional de Cine de Xixón p’averar el Certame a esti conceyu.
