Jesús Martínez Salvador, voceru de Foro Gijon, anunció tres una xunta cola Federación Taurina del Principado de Asturias, que va crease un grupu de trabayu pa ser quien a devolver la matanza de toros a la Plaza d’El Bibio «esti mesmu branu».
Con esti grupu de trabayu quieren acelerar los pasos pa, en casu de gobernar Xixón tres les elecciones del 28 de mayu, «tener un estudiu pormenorizáu de la situación y la operativa de contratación p’actuar de forma inmediata», indicó. «El compromisu ye claru: El Bibio, que cumple 135 años, tien de recuperar l’actividá taurina pa la que foi construyida y que non solo ye perfectamente llegal, sinón que ta protexida», afirmó Martínez Salvador.
Xixón tuvo les sos últimes corríes de toros en 2021, tres el parón pol andanciu de covid-2019. En 2021 y tres les polémiques declaraciones del presidente de la plaza, qu’amás llevó a la plaza dos toros llamaos ‘Feminista’ y ‘Nigeriano’. L’acaldesa de Xixón, Ana González, tres una polémica a nivel estatal, paralizó l’anovación del contratu cola empresa xestionaría, que remataba yá’l so tiempu de concesión.
Les manifestaciones contra la matanza de toros en Xixón veníen siendo multitudinaries nuna ciudá considerada mui animalista y con una llarga tradición, yá dende l’apertura de la Plaza a finales del sieglu XIX, na celebración d’eventos antitaurinos.
