Convocaes les ayudes de Cinemateca a la producción de proyectos de non ficción

L'oxetivu del programa ye sofitar el desenvolvimientu de trabayos con un singular valor creativu, impulsando con ello'l sector cinematográficu asturianu

0
600
Llaboral Cinemateca llanza la so cuarta convocatoria d'ayudes para proyectos cinematográficos asturianos.

Llaboral Cinemateca llanza la so cuarta convocatoria d’ayudes pa proyectos cinematográficos asturianos. Esta iniciativa quier potenciar la producción de llargumetraxes y curtiumetraxes de non ficción por aciu el sofitu a propuestes de singular valor creativu. Ye un nuevu apueste pol desenvolvimientu y fortalecimientu del sector audiovisual de la comunidá.

El programa ta dirixíu a los profesionales y ceadores asturianos o con residencia n’Asturies qu’incluyan nel so oxetu social la creación y producción cinematográfica. Nesta nueva convocatoria va escoyese un máximu de dos proyectos, con una cuantía, tamién máxima, de 15.000 euros per propuesta. Queden escluyíos aquellos trabayos de calter publicitariu, promocional o periodísticu.

Va tenese en cuenta la participación d’equipu técnicu y repartida asturianos nel llargumetraxe o curtiumetraxe

Esta llínea d’actuación de Llaboral Cinemateca tien ente los sos oxetivos aguiyar la creación cinematográfica na comunidá y l’empléu nel sector. Na valoración de los proyectos qu’opten a esta convocatoria va tenese en cuenta la participación d’equipu técnicu y repartida asturianos nel llargumetraxe o curtiumetraxe. Na selección de los proyectu valoraránse la calidá artística y técnica del trabayu, la orixinalidá y el riesgu de la propuesta y la participación significativa d’equipu técnicu y actores asturianos.

El formulariu de solicitú, según les bases completes de la presente convocatoria, ta disponible na web de Llaboral Cinemateca y tendrá de presentase, debidamente rellenáu y xuntu con tola documentación riquida, nes oficines de la Sociedá Pública de Promoción Turística y Cultural del Principáu en Xixón (C/ Luis Moya Blanco, 261) antes del 31 de xunetu de 2019.

Los llargumetraxes ‘Vida vaquera’ de Ramón Lluís Bande, ‘El trabajo o ¿a quién le pertenece el mundo?’ de Elisa Cepedal, ‘In memoriam (La derrota conviene olvidarla)’ de Marcos M. Merino, ‘La teoría del acuerdo’ de Carmen Comadrán, ‘Cantares de una revolución’ de Ramón Lluís Bande y Lengua nativa de David Castro son los trabayos escoyíos nes anteriores convocatories d’ayudes pa proyectos cinematográficos asturianos de Llaboral Cinemateca.