La entrada en serviciu d’esta infraestructura va dexar recuperar anualmente 84.000 tonelaes de material .
El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, visitó güei’l principiu de les obres de la planta nueva de Coxersa pa la clasificación de residuos de la fracción restu, aquello que se recueye na bolsa negra. Esta infraestructura, que va suponer una inversión de 58 millones y va incorporar les últimes meyores tecnolóxiques, va dexar recuperar anualmente 84.000 tonelaes de material, 160.000 de combustible sólido recuperao y 28.000 de material bioestabilizao.
La planta va tener capacidá pa recibir al añu 340.000 tonelaes de residuos depositaos na bolsa negra y 75.000 de voluminosos y refugaya industrial non peligroso.
Amás, la instalación va cuntar con equipos punteros nel tratamientu de residuos y automatización de procesos, dotaos colos sistemes de seguranza más modernos. En concreto, va tener 15 equipos de clasificación óptica d’última xeneración, con sensores de resolución alta que van dexar identificar y recuperar una gama amplia de material reciclable. Otra manera, va incorporar les últimes meyores en comunicaciones y sistemes d’información, lo que va facilitar el rexistru y análisis automáticu en tiempu real de los parámetros de funcionamientu y producción. D’esta forma, consíguese una gran capacidá d’adaptación a les necesidaes de cada momentu.
Per otra parte, tolos edificios de la planta van disponer d’un sistema de captación y aspiración, diseñáu a costafecha pa eliminar el tafu, qu’unvia l’aire a un sistema de biofiltros.
La empresa axudicataria de les obres, Valtalia, tien un plazu de 31 meses pa executar la obra.
Cuatro décades de xestión collaborativa
Na visita, Cofiño valoró les cuatro décades de xestión collaborativa ente’l Principáu y los 78 conceyos asturianos pal tratamientu de residuos. “Esa cooperación déxanos acometer agora la construcción de la planta y ye la meyor base p’algamar los desafíos qu’encaramos y cumplir con una llexislación y unes tases de recuperación cada vez más esixentes”, destacó.
Amás, fixo un llamamientu a la ciudanía y al empresariáu pa que doblen los esfuercios y Asturies seya quién a algamar cuanto primero los oxetivos de reciclaxe afitaos pola Unión Europea.
Pela so parte, la xerente de Coxersa, Paz Orviz, manifestó que la planta futura de clasificación va ser “la más moderna y eficiente d’España”.
A la visita tamién foron los miembros del conseyu d’alministración del consorciu, amás de les alcaldeses de Xixón y Carreño, Ana González y Amelia Fernández, respectivamente, y los alcaldes de Llanera, Gerardo Sanz, y de Corvera, Iván Fernández, conceyos nos que s’asitia’l centru de tratamientu de residuos.
