La Conseyería de Cultura, Política Llingüística y Deporte acaba de publicar les bases del primer Premiu de Guión Cinematográficu. Un gallardón col que’l Gobiernu d’Asturies reafirma’l so compromisu cola promoción y difusión de les llingües propies d’Asturies, afianzando la so presencia nel ámbitu cultural y audiovisual.
Los guiones que van poder participar nesti certame han tar escritos n’asturianu o n’eonaviegu. D’ellos, un xuráu profesional va valorar l’interés y contribución al arriquecimientu de la cultura audiovisual asturiana, la calidá artística de la propuesta y la riqueza y adecuación llingüística presente nel desenvolvimientu del propiu guión.
El Premiu de Guión Cinematográficu ta dirixíu a obres orixinales y inédites creaes pa llargumetraxes de ficción o animación. Cola concesión d’esti premiu, la Conseyería de Cultura busca fomentar la escritura de guiones cinematográficos orixinales en llingua asturiana o n’eonaviegu incentivando, asina, l’apoyu al sector audiovisual nel ámbitu competencial del Principáu d’Asturies y contribuyendo a afianzar, arriquecer y prestixar la llingua asturiana y l’eonaviegu dientro y fuera del territoriu asturianu.
Les bases publicáronse esta selmana nel Boletín Oficial del Principáu d’Asturies (BOPA) y establecen que se va otorgar un troféu y un premiu en metálico pa poner en valor el meyor de los guiones que se presenten. Nesta edición, la cantidá económica que va llevar el trabayu ganador va ser de 6.000 euros.
