La productora Cuatro Gotes ta acabante de dar l’anuncia del que va ser el so próximu trabayu audiovisual de cara al añu 2024. Trátase d’una obra cinematográfica documental sobre l’orixen, desenvolvimientu ya historia de Conceyu Bable, organización fundada en 1974 col envís de caltener y esparder la llingua asturiana.
Con esta producción pretende facese un homenaxe al llabor que llevaron a cabu los homes y muyeres integrantes d’esta asociación que lluchó pola dignificación y recuperación del asturianu nos tiempos de la Transición. La so grabación y estrena nel añu 2024 nun ye casualidá. Ye precisamente esti añu cuando, Conceyu Bable, llega al so 50 aniversariu dende la fundación aquel 16 de payares de 1974.
El documental va cuntar coles intervenciones de los protagonistes, con nomes tan relevantes como Xuan Xosé Sánchez Vicente, Xosé Lluis García Arias, Amelia Valcárcel o Carlos Rubiera, mesmo qu’historiadores que pongan en contestu l’apaición d’esta asociación en defensa de la llingua d’Asturies.
Col entamu d’esta preproducción, faise un llamáu a la xente que caltenga material d’archivu pa completalo el yá existente na productora. Al mesmu tiempu, Cuatro Gotes Producciones busca la collaboración de les instituciones pa llograr un trabayu qu’afonde de manera clara na hestoria de la organización p’algamar un rellatu que correspuenda y faiga xusticia a les reivindicaciones de Conceyu Bable.
