Cuenta atrás pal entamu de la Feria de Muestres

Un añu más espérase un certame multisectorial que va allugar a más de 2.000 espositores nes 16 hectárees

0
127

El próximu vienres va tener llugar la inauguración de la 63 edición de la Feria Internacional d’Amueses d’Asturies (FIDMA), que se va celebrar en Xixón ente’l 3 y el 18 d’agostu nel Recintu Ferial Luis Adaro. Un añu más espérase un certame multisectorial que va allugar a más de 2.000 espositores nes 16 hectárees qu’ocupa’l recintu, pa ufiertar a los 700.000 visitantes previstos un cientu de productos y servicios nos que van tar representaos la práctica totalidá de les actividaes del texíu económico asturianu.

Les bones resultancies rexistraes nos últimos años supunxeron que nun quedara nengún espaciu espositivu ensin ocupar. L’índiz de repetición de firmes perpasa’l 90%, lo que demuestra’l grau de prestu de la práctica totalidá de los presentes na edición anterior.

Coincidiendo cola Feria de Muestres va inaugurase’l nuevu zarru escultóricu nel perimetru de la Cámara y el recintu ferial, na carretera de Somió. Trátase d’una construcción proyectada pol estudiu del arquiteutu Jovino Martínez Sierra na que collaboraron empreses como Ingeco, Aplimetal, Ingoal, Oxiplant, Galvavilés y Fedecor. Esta obra dexó amás, recuperar espaciu espositivu de la denominada Galería Comercial IV.

El cartelu d’anguaño ye obra del artista asturianu Hugo Fontela. N’él, l’artista quixo afigurar «la idea del mar como motor de cambéu y recursu imprescindible p’Asturies«. El cartelu, imaxe del eventu ferial más multitudinariu del branu xixonés, enllaza colos proyectos de la denominada economía azul, qu’utiliza los océanos y los sos recursos como forma de desenvolvimientu económicu sostenible ya innovador.