La Conseyería de Cultura, Política Llingüística y Turismu empecipió los ensayos pa que los técnicos puedan evaluar el comportamientu de distintos materiales nes muries esteriores de la ilesia de Santuyano, n’Uviéu. L’oxetivu ye reparar la so compatibilidá colos morteros orixinales de cara a un futuru revestimientu del templu que protexa les muries y les pintures interiores, que sufren problemes de mugor.
El director xeneral de Cultura y Patrimoniu, Pablo Llión, visitó esta tarde los trabayos del equipu d’espertos, que güei aplicaron xuna primer capa de base de los morteros de cal a la que va siguir la segunda, col acabáu final. Esta actuación, en marcha dende fai unes selmanes, ta financiada pol Principáu con una inversión de 43.064 euros y tien un plazu d’execución de trés meses.
Na primer fase van realizase los ensayos pa evaluar el comportamientu de los materiales y soluciones, que van cubrir un total de 14 metros cuadraos al sur del ábside, otros 14 al norte y 17 al este. El periodu d’evaluación de los materiales va ser d’un añu.
Hasta agora, centráronse nel l’afitamientu de los revestimientos antiguos y al selláu de resquiebros y fisures, y a la llimpieza de les muries esteriores con distintes técniques, en función de la naturaleza del elementu a desaniciar.
Pa llevar a cabu les obres d’afitamientu y reposición de los morteros antiguos esteriores tán recuperándose materiales y técniques tradicionales, como l’aplicación de cales aéreos en pasta, de mayor compatibilidá colos revestimientos esistentes, tal que encamienta l’Institutu del Patrimoniu Cultural d’España (IPCE).
Esta intervención encaróse dempués de qu’el IPCE comunicara al Principáu’l so compromisu para acometer la restauración de les pintures murales de Santullano ya indicara qu’ente les causes del so deterioru figura la falta de revestimiento esterior de les muries de mampostería. El IPCE considera que los trabayos qu’agora se desenvuelven son necesarios antes de la restauración de les pintures interiores.
