Cultura apuesta por priorizar a los artistes asturianos cuando pase la crisis

Berta Piñán analiza coles direcciones de los equipamientos l'impactu de la crisis y la importancia del mundu dixital pal sector mientres el confinamientu

0
574

La conseyera de Cultura, Berta Piñán, señaló esti martes la necesidá d’intensificar l’apueste polos artistes asturianos en retomándose les actividaes de los equipamientos culturales. Tamién encamentó a dar prioridá a la so participación nes nueves programaciones, en pasando l’estáu d’alarma. Piñán presidió una xunta telemática del Pentágonu del Arte, nel que s’integren los responsables del Muséu de Belles Artes, la sala Borrón d’Uviéu, Llaboral Centru d’Arte y Creación Industrial, el Centru Niemeyer y el Muséu Barjola de Xixón. Nel alcuentru participaron tamién los directores xenerales de Cultura y Patrimoniu, Pablo León, y de Mocedá, Clara Sierra.

Na xunta, analizóse l’impactu de la crisis sanitaria sobre la cultura asturiana y los equipamientos venceyaos a la promoción artística. La conseyera de Cultura señaló que “el mundu de la cultura demostró, una vegada más, que ye esencial y necesariu pa la nuesa sociedá”. “El so llabor, altruista y arrogante nesta crisis foi y va ser fundamental pa caltener la salú física y mental de la ciudadanía», añadió.

Piñán afirmó que se debe “reconocer el papel de la cultura ensin escaecer que ye un sector económicu del que dependen munches persones”. Nesi sentíu, apeló “a la necesidá de cavilgar sobre’l papel del mundu dixital nesta situación y sobre el llabor desenvueltu poles y los artistes al traviés d’estos medios”. Al so xuiciu, esto tien de llevar tamién a analizar sistemes polos que los artistes puedan percibir una contraprestación económica en cuenta de l’espardimientu de la so obra en diches plataformes.

Oficina d’asesoramientu

Na xunta, valoróse la oportunidá de crear una oficina d’asesoramientu con vistes a favorecer l’accesu de los ceadores asturianos a llínies de financiación y producción autonómiques, nacionales y europees. Esti órganu va cuntar col sofitu global del Pentágonu del Arte. “El Pentágonu tenía sentíu nel pasáu, pero agora puede y tien d’adquirir una dimensión”, indicó. Coles mesmes, citó la creación de la oficina d’asesoramientu como un exemplu de lo que se pue facer.

Piñán agradeció a les persones responsables de los equipamientos que conformen el Pentágonu del Arte’l llabor que tán desenvolviendo nesta crisis. La conseyera manifestó la so voluntá de caltener en 2020 premios como’l Barjola. «Estos galardones tienen un papel bien importante nel sofitu a la producción nel ámbitu artísticu y cultural”. A lo último, alcordóse que les xornaes que’l Pentágonu del Arte entama dende va cuatro años so la denominación Parte del Arte se realicen na edición de 2020 de manera dixital. En concreto, van dedicase al alderique sobre los retos y desafíos que se-y plantegen a la cultura nel nuevu escenariu xeneráu pola crisis del COVID-19.