La Conseyería de Cultura, Política Llingüística y Deporte pon en marcha anguaño la celebración de San Xurde coincidiendo col Día del Llibru 2025. Esta iniciativa, impulsada en collaboración colos gremios y comerciantes d’Asturies, consiste en regalar llibros y rosques creaes pa la ocasión poles confiteríes y panaderíes asturianes. D’esta miente, búscase realzar la figura de San Xurde, patrón de dellos conceyos y protagonista de lleendes locales como la del cuélebre de Zalón (Ayande), pa convertilo n’iconu de la fiesta asturiana del llibru.
La iniciativa, frutu de la collaboración ente los sectores editorial, panaderu, confiteru, apícola y comercial, propón celebrar esta xornada con un xestu doble: mercar un llibru y una rosca de San Xurde, ellaborada artesanalmente en dos versiones —salada y dulce— por panaderíes y confiteríes. Esti productu, que va tar disponible en tamañu individual, foi ellaboráu con ingredientes de calidá como’l miel d’Asturies IGP.
Cultura quier crear un venceyu ente’l llibru y la tradición pa facilitar la participación ciudadana al rodiu d’una fecha simbólica na que’l llibru se convierta na exa vertebradora d’una programación que refuerza la función de les biblioteques como espacios vivos, creativos y participativos. La rede pública va acoyer más de 150 actividaes en diversos conceyos con motivu del Día del Llibru.
La programación de les biblioteques municipales inclúi cuentacuentos, presentaciones, talleres creativos, llectures dramatizadas, rutes lliteraries, visites escolares, esposiciones y concursos, dirixíos a públicos de toles edaes. Amás, van desenvolvese actividaes como intercambios de llibros o regalos de marcapáxines. El programa completu de los distintos conceyos puede consultase na web oficial: www.biblioasturias.com
