El Boletín Oficial del Principáu publicó la convocatoria antemanada pa 2024 de dos llinies d’ayudes empobinaes a reforzar el sofitu a la creación lliteraria per una parte y por otra la realización de proyectos culturales singulares, prioritariamente nel ámbitu rural. Dambes llinies, impulsaes pola Viceconsejería de Cultura, Política Llingüística y Deporte, suman 348.000 euros d’inversión.
Per una parte, van destinase 48.000 euros a sovencionar la creación d’obres orixinales ya inédites, escrites en cualesquier de les llingües de la comunidá: castellán, asturianu y eonaviego. Van poder optar a les ayudes individuales, de 3.000 euros, tantu profesionales como aficionaos con propuestes narratives, de poesía, de teatru, cómic, ensayu y lliteratura infantil. Estes ayudes aumenten en 8.000 euros al respective de la convocatoria de 2023.
La llinia que sofita actividaes culturales singulares (espectáculos, esposiciones o eventos musicales, lliterarios, artísticos o audiovisuales, ente otros) cuenta con una dotación de 300.000 euros. Esta convocatoria, a la que pueden presentase tanto profesionales o empreses como entidaes ensin ánimu d’arriquecimientu con proyectos en castellán, asturianu y eonaviego, busca llograr un impactu positivu na igualdá ente homes y muyeres y va sofitar manifestaciones culturales que se desenvuelvan prioritariamente nel mediu rural, con sovenciones que pueden algamar los 45.000 euros per proyectu y que se lleven a cabu hasta ochobre de 2024. Nel casu d’esta ayuda, aumenta en 50.000 euros la cuantía respecto al añu pasáu.
El plazu de presentación de solicitúes termina, en dambos casos, el próximu 26 de xineru.
