L’aprobación de proyectu de presupuestos de 2024 va dexar reforzar el sofitu a l’actividá física y al deporte con cerca de 20 millones, de los que más de 5,5 millones van dir destinaos a la promoción de les actividaes deportives, según destacó Vanessa Gutiérrez. La viceconseyera de Cultura, Política Llingüística y Deporte presentó les principales partíes del so departamentu en Bimenes, onde sorrayó la relevancia d’impulsar l’actividá deportiva nos pequenos conceyos.
El sofitu al deporte inclúi un millón pa los clubes d’altu nivel, un compromisu asumíu mientres la campaña electoral. En total, el programa dedicáu al fomentu de les actividaes deportives suma 5.335.307 euros, una medría del 37,63 % con al respective de 2023. A esta cantidá hai qu’añedir una parte de los fondos destinaos a sofitar los eventos deportivos (más de 200.000 euros) enmarcaos nel programa dedicáu a les instalaciones deportives d’Asturies, que tamién aumenta respectu al actual exerciciu y va superar los 10,5 millones. A lo último, el tercer programa de la Dirección Xeneral d’Actividá Física y Deporte ye’l que correspuende a la Estación Iverniza y de Monte “Valgrande-Payares”, con 4 millones, de los que 750.000 euros van dir destinaos a les primeres acciones de la segunda fase de reconstrucción.
La viceconseyera esplicó estos datos acompañada pol alcalde del conceyu, Aitor García Corte, y la directora xeneral d’Actividá Física y Deporte, Manuela Fernández. Primeramente, visitó les instalaciones de lo que diben ser les piscines del conceyu.
Gutiérrez esplicó que’l presupuestu contempla la redacción d’un proyectu pal futuru centru deportivu y cultural que se va construyir aprovechando la estructura d’esti equipamientu, “porque entendemos que ye fundamental sofitar a les entidaes locales con menor población pa que cunten con espacios destinaos a l’actividá física”.
Gutiérrez afirmó que l’aumentu significativu na asignación dedicada a la promoción de l’actividá física y el deporte ta destináu a sofitar viviegamente a los clubes d’altu nivel y “respuende a la creciente necesidá de sofitu pa caltener y fomentar la vitalidá de los clubes que representen a la nuesa comunidá en tol territoriu nacional ya internacional”. Coles mesmes, nun esfuerzu por garantizar un sofitu más equitativu y efectivu, que non sólo beneficie a los clubes d’altu nivel, plantégase una nueva llinia d’ayuda dedicada al deporte base, que busca apurrir un sofitu económicu a aquellos clubes que nun cunten con equipos en categoría nacional. “Consideramos que la creación d’esta nueva llinia, con una dotación de 100.000 euros, va tener un impactu directu nos clubes que participen en competiciones a nivel autonómicu”, señaló Gutiérrez.
Per otru llau, la viceconseyera detalló que la partida destinada a sofitar a les federaciones deportives tamién xube un 11 %, hasta 675.000 euros. De la mesma, aumenta’l sofitu que reciben al traviés de los convenios d’arbitraxe. “Igualmente, quier sofitase el compromisu coles federaciones deportives, reforzando los recursos destinaos a los Xuegos Deportivos d’Asturies, mesmo qu’al tresporte en campeonatos escolares”, añedió.
El compromisu anováu del Gobiernu d’Asturies col deporte tamién inclúi un sofitu específicu al deporte inclusivo cola crecedera de la partida pa FEDEMA, mesmo qu’al fomentu de la práctica deportiva y deportes realizaos por muyeres, al traviés de la xubida n’espardimientu, n’eventos deportivos y una nueva llinia de promoción del deporte para FUNDAVI.
