La conseyera de Cultura, Política Llingüística y Deporte, Vanessa Gutiérrez, anunció esta tarde na Xunta Xeneral qu’el so departamentu va invertir 867.938 euros p’avanzar na dixitalización del patrimoniu prehistóricu asturianu. Esta iniciativa enmárcase nel programa de Redes Territoriales d’Especialización Tecnolóxica (Retech).
Esta actuación, que se va realizar conxuntamente con Cantabria, escuerre modernizar la xestión, caltenimientu, investigación y espardimientu del arte rupestre paleolíticu por aciu l’usu de tecnoloxíes dixitales y ferramientes d’intelixencia artificial.
La inversión n’Asturies, financiada con cargu al Plan de Recuperación, Tresformamientu y Resiliencia, va dexar acometer la dixitalización de les principales cueves con arte rupestre paleolíticu y de pieces depositaes nel Muséu Arqueolóxicu colos más altos estándares de calidá. Esti trabayu respuende a una estratexa integral que tien por oxetu la protección, caltenimientu, xestión, investigación y espardimientu d’esti pervalible patrimoniu.
La documentación dixital que se llogre va ser clave pa conocer fondamente les característiques y l’estáu actual de caltenimientu de los cuévanos asturianos y disponer d’información p’ameyorar la xestión del accesu a les cueves, lo que va dexar acutar o controlar les entraes cuando seya necesario pa la so protección. Igualmente, va facilitar l’espardimientu del patrimoniu cultural per aciu tecnoloxíes como modelos 3D navegables o realidá aumentada, colo que s’avera esti legáu a tola ciudadanía.
