El Gobiernu d’Asturies reconoz la producción lliteraria y escénica premiada a lo llargo del añu pasáu cola entrega de los gallardones impulsaos pola Conseyería de Cultura, Política Llingüística y Turismu. L’actu va celebrase mañana xueves a les 19:00 hores nel patiu del Palaciu Conde Toreno d’Uviéu y va cuntar cola presencia de la conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García.
Los ocho gallardones busquen distinguir a les meyores obres lliteraries nos diferentes xéneros y disciplines n’asturianu y tamién les producciones teatrales profesionales creaes en llingua asturiana o eonaviegu. Tán dotaos con una cuantía de 6.000 euros, sacante l’Enriqueta González Rubín de Narrativa Moza, dotáu con 3.000 euros y la edición o producción de la obra ganadora.
A lo llargo del actu, nel que va facese entrega a les persones ganadores d’un troféu, van presentase tamién los llibros premiaos y yá editaos y va concluyir la velada con música al cargu de Daniel García de la Cuesta y Luis Núñez.
Los ganadores de les convocatories del añu 2022 fueron:
- XLIII Premiu Xosefa Xovellanos de Novela: Gonzalo González Barreñada por El viaxe del cacique.
- XXVIII Premiu Xuan María Acebal de Poesía: Marta Mori d’Arriba por Los carreros del tiempu.
- XXVIII Premiu Máximo Fuertes Acevedo d’Ensayu: Damián Barreiro Maceiras por Asturianía kitsch: Decálogu de la cultura pop astur.
- XV Premiu M.ª Josefa Canellada de Lliteratura Infantil y Xuvenil: Blanca Inés Fernández por El cartafueyu d’Alquimia.
- XIV Premiu Alfonso Iglesias de Cómic: Guillermo Menéndez Quirós por Ana María. La llobera d’Asturies.
- II Premiu Florina Alías a la Meyor Traducción al asturianu: María Antonia Pedregal Montes por La palabra final. Diariu d’un suicidiu.
- II Premiu Enriqueta González Rubín de Narrativa Moza: Andrés Fernández Menéndez por 1929.
- VI Premiu Nel Amaro de Teatru Profesional: Carlos Alba por Les madreñes vacíes.
