Asturies va entamar los próximos 16, 17 y 18 d’abril les primeres xornaes Música en Rede, Alcuentru Profesional, una amuesa sectorial dedicada a la industria musical asturiana. L’alcuentru, que se va celebrar en Llaboral Ciudá de la Cultura, plantégase como un puntu d’alcuentru profesional y comercial p’axuntar a los axentes del sector musical y a especialistes de distintos ámbitos.
Nesti sentíu, la conseyera de Cultura, Política Llingüística y Deporte, Vanessa Gutiérrez, esplica que l’oxetivu pasa por “amosar el talentu de los nuesos artistes de la que se xeneren espacios d’alderique y favorécense nueves dinámiques de collaboración y desenvolvimientu”. Gutiérrez asegura que’l Principáu quier “abordar de la mano del sector temes del so interés p’ayudar a visibilizalo y profesionalizalo”. Pa ello, esplica la conseyera, Música en Rede “va cuntar con espertos de distintos ámbitos y procedencies xunto a una significativa participación d’artistes asturianos”.
La primer edición de l’amuesa va tener una programación diversa que se va estremar en secciones pa fomentar la interacción ente artistes, profesionales y públicu. Asina, la sección Erbíes va constar de cinco sesiones formatives a manera de talleres especializaos que van encetar aspeutos clave como l’asesoramientu llegal, programación, xestión, creación d’audiencies, sostenibilidá n’eventos y calendarios.
Col nome de Conxustes van entamase trés meses redondes que van xirar alredor del asociacionismu, internacionalización y medios de comunicación. A lo último, la sección Llabor va ufiertar 13 actuaciones en formatu exhibición y curtia duración d’artistes asturianos venceyaos a distintos estilos musicales.
En paralelu, l’amuesa va cuntar con un puntu d’asesoramientu denomináu En Rede, un alcuentru comercial llamáu Xunta y dos presentaciones curties de proyectos designaos como Rolda. El plazu d’inscripción, tanto pal alcuentru comercial como pa les presentaciones, va siguir abiertu hasta’l 25 de marzu, mientres que les y los profesionales que quieran participar en Música en Rede van poder inscribise hasta’l día 12 d’abril na páxina web https://musicaenrede.asturiesculturaenrede.es/, onde tamién se puede consultar tola información relativa al eventu.
Cola celebración d’esti alcuentru empobináu a la industria musical, la conseyería de Cultura, Política Llingüística de Deporte reafita’l so apueste por impulsar el sector cultural al traviés d’alcuentros sectoriales, llabor empecipiáu l’añu pasáu cola amuesa d’artes escéniques, que volverá entamase nesti 2024.
La relación de conteníos y los profesionales que van participar ye la siguiente:
Erbíes. Talleres formativos de:
– Desenvolvimientu d’aspeutos técnicos y llegales nes propuestes artístiques, con Patricia Hermida (Asociacion Galega d’Empreses Musicais)
– El papel de la persona encargada de la programación na xestión y organización d’eventos, con Germán Quimasó (Sonde3) y Jordi Lauren (PlayPlan)
– La creación d’audiencies, con Xeorxa Taglietti (The International Consulting Network for Arts&Culture)
– Les ferramientes públicu/quitaes pal desenvolvimientu de proyectos musicales sostenibles, impartida por Xavier Cester (ICEC)
– Los calendarios y cronogramas na producción musical, con Rómulo Sanjurjo (Jau Cultura).
Conxustes. Meses redondes sobre:
– Asociacionismo y profesionalización del sector, con Patricia Hermida (AGEM), Manuel Alonso (Músiques Ao Vivu), Bree Delian (Llar) y Pilar Aguilar (Sympathy for the Layer)
– Modelos de internacionalización musical, con Lidia Hinojo (Fira Mediterrània de Manresa) y Armand Llácer (Fira Trovam)
– Medios de comunicación y música: estáu de la cuestión, con Sandra Mariña (La Mariña Comunicació), Bea Camiña (Produtriz Agency) y Ana Gómez de Castro (Live Nation).
Llabor. Actuaciones d’Elena del Frade, Galgo, L-R, César Latorre, Ferla Megía, Pablo Canalís, Fee Reega, Mapi Quintana, Alberto & García, José Manuel Tejedor, Algaire, Héctor Braga y Mardom.
Puntu d’asesoramientu En Rede, nel que van participar Bea Camiña (Produtriz Agency), Patricia Hermida (AGEM), Rubén Otero (Luneda), Manuel Alonso (Músiques Ao Vivo) y Pilar Aguilar (Sympathy for the Lawyer).
