La Conseyería de Cultura, Política Llingüística y Turismu empecipió la tramitación para declarar Bien d’Interés Cultural (BIC) de calter inmaterial los oficios y saberes rellacionaos col bote de vela llatina y la práctica de la so navegación na Ría del Eo. Colectivos sociales, entidaes deportives de Castropol y el mesmu conceyu han promovido la propuesta, sofitada na tradición histórica.
La práctica de navegación a vela llatina ye un patrimoniu intanxible acomuñáu a técniques y conocencies tresmitíes de xeneración en xeneración, qu’algama tamién a la construcción de botes y apareyos. Con ella rellaciónense una serie d’oficios tradicionales, ente los que sobresal el de carpinteru de ribera, en riesgu de desapaición, pero con un referente relevante en Castropol: Astilleros Pacho, postreru esponente d’una brengosa industria naval que dende’l Eo satisfixo la demanda de la flota pesquera y de cabotaxe asturiana, hasta’l puntu que nel sieglu XIX más del 60% de la mesma venía de los estelleros del Eo.
El procesu alministrativu pa declarar BIC la vela llatina y los sos oficios y saberes tradicionales va enllargase un máximu de dos años y va tener que percanciar los preceptivos informes per parte de l’Academia de la Hestoria, la Universidá d’Uviéu y el Real Institutu d’Estudios Asturianos. Darréu, l’aprobación definitiva va corresponder al plenu del Conseyu de Patrimoniu.
La Ría del Eo –y, nella, Castropol como puntu principal- constitúi l’área xeográfica de referencia n’Asturies en relación al saléu en bote de vela llatina. Esta actividá esperimentó un importante resurdir nos últimos tiempos, de la mano, ente otros sofitos, de l’Asociación del Bote de Vela Llatina y el Club de Vela de Castropol.
