Cinco comunidaes de les rutes del norte entamen esta iniciativa, que n’Asturies financia’l Bancu Sabadell y cuenta cola collaboración de los conceyos d’Uviéu y Xixón.
La Conseyería de Cultura, Política Llingüística y Turismu lleva a les ciudaes d’Uviéu y Xixón el programa Caminos d’estrelles, qu’entama en collaboración col Conseyu Xacobéu y dambos conceyos, y que financia’l Bancu Sabadell.
L’actividá, que va constar de dos charles y la observación del cielu, va llevase a cabu los díes 29 y 30 de xunetu, en Xixón, y el 20 d’agostu n’Uviéu, desenvueltes poles asociaciones astronómiques Omega y Cielos Despejados, respectivamente.
L’Antigua Escuela de Comerciu de Xixón va acoyer el 29 de xunetu, a les 19:30 hores, la conferencia El camín de les estrelles. Para poder asistir ye mester inscribise primeramente nel teléfonu 985 096 630. El 30 de xunetu, a partir de les 23:00 hores, l’asociación Omega va llevar a cabu una observación astronómica abierta al públicu nel puertu deportivu, detrás de l’antigua rula.
La conferencia El Camín de Santiago al traviés de l’astronomía va celebrase’l 20 d’agostu, a les 20:00 hores, nel Colexu d’Abogaos d’Uviéu. La entrada va ser llibre hasta completar aforu. El mesmu día, a les 22:00 hores, l’asociación Cielos despejado va entamar una observación astronómica pública na plaza de la catedral.
El programa Caminos d’estrelles busca averar l’astronomía al públicu al traviés de charles y conferencies, xunto cola observación de los cielos asturianos. Tamién pretende amosar los venceyos ente’l Camín de Santiago y el cielu, non yá pol so componente mitolóxicu y/o relixosu, sinón tamién pola so función na orientación de les persones que realizaben la pelegrinación.
Amás, esta iniciativa forma parte de la programación oficial del Xacobéu 21-22 alcordada nel Conseyu Xacobéu y que se va desenvolver en cinco comunidaes del norte representaes nel conseyu: Asturies Aragón, Cantabria, Castiella y Llión, y Galicia, toes elles con llugares emblemáticos rellacionaos coles rutes compostelanes. El programa va consistir na celebración de 24 xornaes astronómiques ente xunu y setiembre en localidaes de les rutes del norte, ente les que s’atopen Uviéu y Xixón.
Como toles actividaes de Xacobeo 21-22, Caminos d’estrelles permite la collaboración público-privada, que permite llograr beneficios fiscales la so unión d’esfuerzos al traviés de l’acción de mecenalgu de la programación xacobea, de la qu’ufierta actividaes de calidá en distintes localidaes del Camín con participación d’axentes sociales y culturale
