La conseyera de Cultura, Política Llingüística y Turismu, Berta Piñán, presentó esta tarde’l primer Plan del Horru, sofitáu con una inversión prevista para anguaño de 585.000 euros. “Tratar d’un llibru blancu que marca un antes y un dempués en salvaguardar y protección del patrimoniu etnográficu, porque per primer vegada cuntamos con una fueya de ruta qu’enceta de manera integral les actuaciones necesaries pa garantizar el caltenimientu de horros, paneres y cabazos d’Asturies”, señaló.
Cambéu normativu y nuevos usos
El testu plantega l’actualización de la normativa autonómica vixente al envís de clarificar y facilitar los trámites pq que cualquier particular o alministración pueda encarar el treslláu o la rehabilitación d’estos bienes con mayor seguridá xurídica. En concretu, el documentu apunta la necesidá de modificar la redacción de los artículos 103 y 104 del reglamentu de desenvolvimientu de la Llei de Patrimoniu Cultural d’Asturies, que regulen lo relativo a la posibilidá de treslladar estos bienes, qué obres pueden realizase y qué usos han de tener.
Los cambeos busquen cubrir llagunes esistentes y ufiertar mayor concreción y claridá sobre lo que se puede o non facer en horros y paneres y tamién sobre la manera de llevalo a cabu.
En desenvolvimientu del plan, Cultura presentó tamién una propuesta de cambéu del reglamentu que, ente otres cuestiones, plantega criterios de protección estremando los elementos etnográficos pola so antigüedá o pola so singularidá no qu’a talla, decoración, configuración o característiques constructives refierse, según los sos posibles nuevos usos. Nesi sentíu, la propuesta contempla que caltengan l’usu tradicional, ensin posibilidá de cambéu a un usu alternativu compatible, los horros, paneres y cabazos que sían declaraos bien d’interés cultural (BIC), los que tean incluyíos nel Inventariu de Patrimoniu Cultural d’Asturies o nun catálogu urbanísticu con protección integral, según los que reciban dicha protección per llei.
Nel casu de bienes incluyíos nun catálogu urbanísticu con nivel de protección parcial, la propuesta plantega que puedan realizase usos xustificaos, siempres que nes intervenciones d’adaptación al nuevu usu respétense les característiques básiques del bien etnográfico. Asina, contémplase l’almisión d’aquelles obres ya intervenciones que, previu llogru de llicencia municipal y demás autorizaciones sectoriales, favorezan el so caltenimientu. Sicasí, non podrán autorizase nuevos horros o paneres desvenceyaos de la vivienda.
Como usos xustificaos, propónense los siguientes:
– Aquellos que dexen almacenaxes d’instrumentos o productos ensin venceyar al ámbitu agropecuariu.
– Los que complementen una ufierta d’hostelería o hotelería, siempres que nun constituyan el so elementu principal y que nun supriman nin despinten pegollos, nin dispongan un zarru ente los mesmos.
– Los que favorezan la información turística o cultural.
– Los qu’empresten espaciu añedíu al usu habitacional d’otros edificios allegantes.
– Los que dexen ser útiles como puestos de vienta, especialmente de productos típicos, agrarios, ganaderos, forestales o de floricultura, ente otros.
Esta propuesta de cambéu del reglamentu de desenvolvimientu de la Llei de Patrimoniu Cultural va sometese llueu a consultar previa pa empecipiar la so tramitación.
Midíes de protección y caltenimientu
Les midíes plantegaes p’ameyorar la protección y caltenimientu d’estos elementos etnográficos inclúin l’afitamientu y refuerzu del proyectu Pegollu, puestu en marcha en 2021 en collaboración cola Asociación d’Amigos del Horru y Cetemas, pa crear un bancu de pieces trataes y debidamente recuperaes pa poder ser utilizaes por artesanos y propietarios, de forma gratuita, en futures restauraciones. Hasta’l momentu, desmontáronse ocho horros que s’atopaben n’estáu de ruina.
Ente les propuestes p’ameyorar el caltenimientu ta la puesta en marcha d’un programa piloto que dexe midir distintos parámetros pa diagnosticar l’estáu estructural de cada inmueble. Amás, plantégase la redacción d’una guía de bones práctiques pa la rehabilitación y de un plan preventivu de caltenimientu y la puesta en marcha d’un concursu d’idees que premie les meyores soluciones de recuperación pa nuevos usos.
El plan encamienta caltener y reforzar la convocatoria de les subvenciones de sofitu a particulares y alministraciones públiques pa la rehabilitación d’estos inmuebles, dotada anguaño con 350.000 euros. Amás, propón realizar una selección de los elementos que tengan un especial interés patrimonial pa promover la so protección individual como BIC, ya impulsar la rehabilitación d’edificaciones singulares como’l casu del horru de Vis, en Ponga, que cunta con una partida de 40.000 euros nos presupuestos d’anguaño pa la so recuperación.
Tamién se contempla collaborar col Ministeriu de Cultura y Deporte pa llograr la reconocencia nacional de les técniques constructives y los oficios rellacionaos col mundu del horru n’Asturies y n’otres rexones españoles como manifestación d’interés cultural.
Tresmitir y documentar los oficios tradicionales
El postreru de les exes d’actuación del Plan del Horru céntrase na necesidá de poner en marcha iniciatives formatives de cara a la pervivencia y proyección de los oficios tradicionales. Trátase d’un aspeutu importante non solo a nivel patrimonial, sinón tamién de cara al desenvolvimientu rural pa crear oportunidaes d’empléu.
Tamién se citen acciones destinaes a aumentar l’espardimientu del patrimoniu etnográficu, cola creación d’una plataforma web, la puesta en marcha de rutes culturales o la documentación de los testimonios d’artesanos y propietarios venceyaos a estos bienes.
