La rede d’equipamientos programó esti mes 250 actividaes por tola xeografía asturiana. La ufierta inclúi alternatives pa toles edaes, bona parte d’elles de calter gratuitu.
Música, teatru, cine, esposiciones, charres, talleres divulgativos o itinerarios patrimoniales al campu son dalgunes de les propuestes. La celebración del Día del Llibru, el 23 d’abril, va tener una importante relevancia nel programa con propuestes como charres o alcuentros lliterarios, ente otres.
La ufierta impulsada dende los equipamientos públicos toma la práctica totalidá del territoriu. Asina, los circuitos del programa Asturies Cultura en Rede tienen programaes un total de 118 actividaes d’artes escéniques, lliteratura, música, cultura tradicional y los alcuentros d’Autores nel Camín.
El Muséu del Xurásicu d’Asturies, el Centru del Prerrománicu, el Parque Prehistóricu de Teberga, el Centru d’Arte Rupestre de Pedrete Bustillo y el Muséu Etnográficu de Grandas de Salime ellaboraron un programa de 28 actividaes nes que la divulgación y les iniciatives pa los más pequenos adquieren protagonismu.
El cartelu d’actividaes de Llaboral Centru d’Arte va incluyir esposiciones y media docena d’acciones que van dende los talleres infantiles a les charres y xornaes de puertes abiertes. El Centru Niemeyer d’Avilés va celebrar una nueva edición del Festival de Cine LGTBI, teatru y música, amás de les esposiciones temporales dedicaes a Salvador Dalí y Gerardo Vielba.
La Orquesta Sinfónica del Principáu d’Asturies vuelve a entamar el so programa OSPA de cerca p’averar la música clásica a distintes localidaes. Esta ocasión, del 11 al 14 d’abril va visitar La Felguera, La Pola Siero, Avilés y L.luarca. Col so nuevu director titular y artísticu, Nuno Coelho, la OSPA va interpretar una selección del propiu maestru de Les Indes Galanties, ópera ballet del compositor Jean-Philippe Rameau, xuntu a una de les obres más famoses del repertoriu sinfónicu, la Quinta Sinfonía de Beethoven.
El Muséu de Belles Artes va ufiertar la so programación didáctica pa públicu infantil y adultu, acompañada de charres y visites empuestes. Tamién va poder vese nel Muséu Arqueolóxicu d’Asturies hasta’l día 9 la esposición temporal Cuadonga, Les buelgues y los relatos, dientro de los actos de conmemoración de los 1.300 años de la batalla.
La Biblioteca d’Asturies y la Biblioteca Xovellanos caltienen la so ufierta de cuentacuentos y actividaes infantiles y los alcuentros lliterarios y talleres destinaos destinaos a los adultos. Dambos centros peracaben una programación específica pa conmemorar el Día del Llibru.
