La conseyera de Cultura, Política Llingüística y Turismu, Berta Piñán, anunció güei nel Real Sitiu la constitución d’una mesa de trabayu pa preparar l’axenda cultural del Gobiernu d’Asturies pa los actos conmemorativos del XIII centenariu de la batalla de Cuadonga.
Piñán espunxo los planes del so departamentu mientres una xunta na que participaron l’abá de Cuadonga, Adolfo Mariño; l’alcalde de Cangues d’Onís, José Manuel González; el director del Real Institutu d’Estudios Asturianos (Ridea), Ramón Rodríguez, y el director xeneral de Cultura y Patrimoniu, Pablo León.
Na xunta, Cultura presentó les llinies maestres del plan ellaboráu mientres l’últimu añu pa la celebración, con una programación qu’incluye, amás del ámbitu cultural, la investigación, la promoción del turismu cultural y relixosu y la promoción deportiva.
Los oxetivos xenerales de la propuesta parten de la premisa d’articular la conmemoración dende un enfoque d’igualdá y respetu, como un exerciciu de reflexón que tenga en cuenta los valores naturales, históricos y espirituales que confluyen en Cuadonga.
Asina mesmo, el programa va promover l’estímulu a la creación cultural en tolos sos ámbitos, amás d’establecer víes efectives de trabayu en rede ente les alministraciones públiques y impulsar la cooperación institucional, la collaboración públicu-privada y la coordinación colos distintos axentes que formen el texíu cultural asturianu, cola mira de reforzar la imaxe y la conocencia d’Asturies como comunidá creativa, innovadora, dinámica y diversa.
