La Conseyería de Cultura, Política Llingüística y Turismu va dedicar 1,8 millones en 2022 a seis nueves llínees d’ayudes empobinaes a les artes escéniques y visuales, la música, la edición, el cine audiovisual y el videoxuegu, dotaes con 700.000 euros, y a programar actividaes per tol territoriu al traviés de los circuitos de Asturies, Cultura en Rede, pa los que se conseña un millón, al que se suma la partida pa iniciatives impulsaes por asociaciones y entidaes ensin ánimu d’arriquecimientu, que va cuntar con 100.000 euros.
El presupuestu d’esti departamentu pal próximu exerciciu algama los 69.715.042 euros, con una xubida de casi’l 16,28% al respective de anguaño y va dexar aumentar los recursos pa toles sos competencies. Ente les principales acciones previstes destaquen tamién el financiamientu de los planes ordinarios de sostenibilidá turística n’Ayer y Avilés, la inversión de 10 millones nel plan de Payares y la puesta en marcha de la enseñanza d’asturianu y eonaviego non reglada p’adultos.
La conseyera Berta Piñán señaló güei na Xunta Xeneral que les cuentes del so departamentu suponen “un proyectu ambiciosu” col que pretende consolidase la recuperación económica n’ámbitos especialmente afectaos pola pandemia y sentar les bases de nueves polítiques “inspiraes pol diálogu estrechu colos sectores y por unes propuestes actualizaes y asitiaes nel territoriu y la ciudadanía”.
Planes de sostenibilidá
En materia de turismu, la conseyería aumenta un 30% el presupuestu pa financiar los planes ordinarios de sostenibilidá en destín. En 2022, la viceconsejería va invertir 1.600.000 euros pa la cofinanciación d’estos proyectos, 500.000 más qu’anguaño. Esta cantidá, xuntu cola aportación estatal y local, va dexar desenvolver na contorna d’Avilés y n’Ayer dos tales iniciatives que van dar l’impulsu definitivu pa la crecedera turística de dambes zones.
Amás, a los casi 13.000.000 euros del presupuestu de Turismu pa 2022 van sumase otros 25 millones que se van distribuyir al traviés de distintes llínees antes de rematar l’añu.
Asina, al traviés del Plan Nacional Turísticu Xacobeo, van llevar a cabo actuaciones venceyaes al Camín de Santiago con una inversión de 11.100.000 euros. D’ellos, 5.300.000 van empobinar a la sostenibilidá, digitalización y accesibilidá de les rutes xacobees asturianes. Coles mesmes, por aciu la llínea de rehabilitación de patrimoniu históricu na redolada d’estos itinerarios, va acometese la última fase de l’ampliación del Muséu de Belles Artes, con una inversión de 5.800.000 euros.
Tamién con cargu a fondos europeos van sumase 7.474.000 euros al presupuestu p’actuaciones de cohesión del plan territorial 2021, y otros 6.600.000 pa tramitar una llínea d’ayudes destinada a financiar proyectos d’eficiencia enerxética n’agospiamientos turísticos.
Nueves llínees de subvenciones culturales
El presupuestu de la Dirección Xeneral de Cultura crez un 9,1% y va entornase na renovación del sistema de subvenciones. Al marxe de les nueves llínees pal sector y de la dotación pa los circuitos culturales, les ayudes p’actividaes en museos municipales xuben hasta 75.000 euros y les subvenciones p’anovar la so infraestructura, hasta 50.000.
Los fondos de sofitu al Muséu de la Sidra pasen de 8.640 a 30.000 euros nel añu en que se va presentar énte la Unesco la candidatura a Patrimoniu Mundial Inmaterial de la cultura sidrera.
El Muséu de Belles Artes, pela so parte, va ver aumentada la so tresferencia en 85.953 euros, de la que se va crear xuna partida nueva, dotada con 70.000, p’alquisición d’obra.
Tamién se van dedicar 200.000 euros a un programa cultural en redol al 1.300 aniversariu de la batalla de Cuadonga, que va incluyir una gran esposición nel Muséu Arqueolóxicu, y la inauguración del Camín de los santuarios, ente Uviéu-Cuadonga y Llébana. Otros 100.000 euros van sirvir pa dar sofitu al Festival Intercélticu de Lorient, onde Asturies va ser la comunidá convidada d’honor, y 75.000 más van dexar la presencia asturiana na Feria Internacional del Llibru de Frankfurt, onde España va ser el país invitáu.
500.000 euros pal Prerrománicu
Nel Prerrománicu van invertise 500.000 euros. En concreto, Patrimoniu va suscribir dos talos convenios col Arzobispáu d’Uviéu pa obres nes cubiertes de San Salvador de Valdediós y Santa María de Bendones, va afaese l’accesu piatonal a los monumentos del Naranco, va llimpiase la Foncalada y van correxise mugores na Cámara Santa.
A los xacimientos arqueolóxicos con arte rupestre paleolíticu destínense 100.000 euros pa intervenciones de caltenimientu y otros 110.000 a la meyora de la cubierta d’accesu a Tito Bustillo.
Coles mesmes, Patrimoniu va aprovir xuna ayuda de 100.000 euros pa subvenciones a los conceyos del Camín de Santiago y va doblar la cuantía destinada a ameyorar los albergues, hasta los 30.000.
Tocantes a la restauración d’horros y paneres, dóblense los fondos pa subvenciones, que lleguen hasta los 300.000 euros.
Proyectu Faladera
La Dirección Xeneral de Política Llingüística va impulsar una nueva llinia d’ayudes, dotada con 86.000 euros, destinada a la Federación Asturiana de Conseyos (FACC) pal Proyectu Faladera de formación d’asturianu y eonaviego non reglada p’adultos, en collaboración colos conceyos y los Servicios de Normalización Llingüística.
El presupuestu de l’Academia de la Llingua Asturiana amontar en 10.000 euros, hasta llegar a 240.000.
Plan de desestacionalización de Payares
La principal partida de la Dirección Xeneral de Deporte son los 10 millones destinaos a la execución del proyectu de desestacionalización de la estación de Valgrande-Payares, cofinanciáu pol Institutu de Transición Xusta (7,5 millones) y el Gobiernu d’Asturies (2,5 millones).
Tamién s’apuesta pol piragüismu, con una subvención nominativa de 235.000 euros destinada a la federación asturiana que va implicar xuna xestión más eficiente de la residencia de Trasona y del caltenimientu del campu de regatas.
Amás, amóntase de forma sustancial les ayudes a los Xuegos Deportivos y tamién al deporte d’altu nivel (340.000 euros), según les empobinaes a les entidaes pal fomentu del deporte tradicional, que pasen de 18.000 a 30.000 euros.
