L’Academia de la Llingua Asturiana (ALLA) propunxo, mediante votación y por unanimidá, en Xunta Estraordinaria, que D. David Guardado Diez algamare la condición de miembru numberariu de l’Academia. David Guardado Diez (Xixón, 1970), ye llicenciáu en Filoloxía Inglesa, diplomáu n’Estudios Avanzaos en Filoloxía y Especialista Universitariu en Llingua Asturiana.
Los sos intereses d’investigación pasen pela sociollingüística y la historia esterna
de la llingua, mentanto que la so carrera profesional, venceyada dende 2001 al Departamentu de Conteníos y Productu de Prensa Ibérica, céntrase na tresformación dixital, ámbitu nel que ye una autoridá a nivel estatal. Pioneru na presencia del asturianu n’internet, yá dende la última década del sieglu pasáu, foi coautor d’estremaes iniciatives que, enfocaes na información xeneral y cultural, contribuyeron enforma a asitiar el nuesu idioma na virtualidá y dientro del campu de les nueves teunoloxíes de la información. Na estaya teórica, David Guardado, desenvuelve una esmolición académica sobre l’asturianu que tien los sos finxos na normalización, la estandarización, la codificación y la
identidá.
Al so llargu compromisu históricu cola militancia llingüística, amiéstase la participación en proyeutos editoriales, culturales y sociales, como Reciella, families pol asturianu, asociación que trabaya na organización d’actividaes dirixíes a la tresmisión interxeneracional del asturianu. L’ALLA cuenta dar acoyida al nuevu Académicu’l vienres 5 de mayu, nel actu
solemne del 44 Día de les Lletres Asturianes.
